Mkuu wa waamuzi wa FIFA, Pierluigi Collina, amepinga vikali madai ya upendeleo wa waamuzi katika mchezo wa hatua ya 16 bora ya michuano ya Dunia uliomalizika kwa Argentina kuifunga Misri kwa mabao 3-2. Collina amesema waamuzi walifanya kazi kwa uhuru kamili na hakuna mtu, hata viongozi wa juu wa FIFA, anayeweza kuingilia maamuzi yao uwanjani.
Akizungumza katika mahojiano yaliyochapishwa kwenye tovuti rasmi ya FIFA, Collina alisema ukosoaji dhidi ya waamuzi ni sehemu ya kawaida ya soka, lakini alikataa madai yasiyo na ushahidi yanayolenga kuhoji uadilifu wa waamuzi. “Majadiliano ya kujenga kuhusu maamuzi yataendelea kuwa sehemu ya soka, lakini tuhuma zisizo na msingi hazina nafasi katika mchezo wetu,” alisema Collina.
Bila kusahau meridianbet ndio wakali wa ODDS KUBWA, Machaguo zaidi ya 1000 na kila kitu ukitakacho. Bashiri kijanja hapa
Kauli hiyo imekuja baada ya Misri kulalamikia baadhi ya maamuzi katika mchezo huo, wakidai walitendewa isivyo haki baada ya kupoteza mchezo ambao walikuwa mbele kwa mabao 2-0 kabla Argentina haijafanya mabadiliko makubwa na kushinda kwa bao la dakika za nyongeza lililofungwa na Enzo Fernández. Kocha wa Misri, Hossam Hassan, alidai huenda kulikuwa na shinikizo kwa mwamuzi ili Argentina ibaki kwenye mashindano.
Shirikisho la Soka la Misri pia lilisema kulikuwa na matukio kadhaa muhimu yaliyowatia mashaka kuhusu usawa wa maamuzi. Walipinga zaidi bao la Mostafa Zico lililokataliwa baada ya VAR kubaini kulikuwa na faulo katika hatua ya awali ya shambulizi. Collina alitetea uamuzi huo akisema teknolojia ya VAR ilifanya kazi sahihi baada ya kubaini kosa la Marwan Attia dhidi ya beki wa Argentina Lisandro Martínez.
“Faulo ni faulo, haijalishi kama inaonekana wazi au la. Kama mwamuzi hakuiona uwanjani, VAR ina mamlaka ya kuingilia kati na kusaidia kurekebisha uamuzi,” alisema Collina. Pia alitetea uamuzi wa kutokupatia Misri penalti baada ya mgongano kati ya Mohamed Salah na Julián Álvarez kabla ya Argentina kupata bao la ushindi.
Collina alieleza kuwa mwamuzi pamoja na VAR waliona tukio hilo kuwa ni mguso wa kawaida wa soka na siyo kosa la penalti. “Kukanyaga mguu wa mpinzani ni faulo, lakini mlinzi anayegusa mpira kwanza na kisha kutokea mgusano wa kawaida wa mchezo hajafanya kosa,” alisema. Aliongeza kuwa baadhi ya maamuzi yataendelea kuwa na mjadala kwa sababu soka lina sehemu ya tafsiri, lakini FIFA inaamini mfumo wa VAR umetumika kwa usahihi katika mashindano hayo.
