Beki maarufu wa kulia Dani Alves ameikashifu klabu yake kwenye mitandao ya kijamii baada ya klabu ya Pumas kudai kuwa alipata jeraha kubwa la goti.
Beki huyo wa Brazil, ambaye alijiunga na timu ya Mexico mwezi Julai baada ya kuondoka Barcelona, alipata pigo wakati wa mazoezi wiki hii hali iliyosababisha kukosekana kwenye kikosi chao cha siku kwenye mechi dhidi ya Juarez.
Klabu ya Pumas ilidai kwamba Alves ‘alikuwa chini ya tathmini ya matibabu’, ambapo mchezaji huyo mwenye umri wa miaka 39 alikanusha na kukemea mtandaoni.
Katika taarifa, klabu ya Pumas ya Mexico ilisema: “Dani Alves hatakuwepo kutokana na jeraha la mshipa wa goti wa kulia, ambao bado unafanyiwa tathmini na timu ya madaktari ya klabu hiyo.”
Lakini cha Kushangaza Alves alitweet: “Aliyeandika haya hakujua hali halisi. Katika mazoezi, usiku wa kuamkia safari, rafiki yangu Diogo, ambaye anacheza nami, aliishia kunijeruhi kwenye hatua ya mwisho ya mazoezi.
“Kama tahadhari tuliamua kutosafiri hadi mechi ya mwisho. Kwa kuwa hatuna tena malengo ya kupambana katika mashindano katika raundi hii ya mwisho. Nataka kumjulisha kila mtu kwamba namshukuru Mungu mwema, kila kitu kiko sawa.”
Muda mfupi baadaye, Pumas ilithibitisha: ‘Ili kufafanua kutokuelewana kuhusu jeraha la mchezaji wetu Dani Alves, klabu ya chuo kikuu cha taifa inaripoti: Mchezaji huyo alipata pigo la goti mwishoni mwa mazoezi na kwa tahadhari hakusafiri kukabiliana na F.C Juarez. Jeraha linahitaji matibabu ya msingi na kupumzika.
“Kwa sababu ya ukosefu wa mawasiliano na safari ya timu kwenda Ciudad Juarez, taarifa zisizo sahihi zilichapishwa. Kwa kosa hili, tunatoa pole kwa Dani Alves.”
Jeraha lililoorodheshwa hapo awali, la kuumia mshipa wa kati, lingeweza kumzuia beki huyo kutoshiriki mechi ya mwisho ya Kombe la Dunia baadaye mwaka huu.
Alves amecheza mechi 12 akiwa na Pumas na tayari ameandikisha asisti nne tangu ajiunge na timu hiyo mapema msimu huu wa joto.
Mwezi uliopita tu, beki huyo wa kulia aliaga kwa hisia kali kutoka kwa wachezaji na wafuasi wa Barcelona baada ya timu hiyo ya Katalunya kumenyana na Pumas katika mechi ya kirafiki ya kujiandaa na msimu mpya.
Kabla ya mechi hiyo, Alves alipata shangwe kubwa kutoka kwa mashabiki wakati akijitokeza kujiandaa.
Mbrazil huyo alishindwa kuzuia hisia zake huku akilengwa na machozi kabla ya kuwakumbatia wachezaji wenzake wa zamani na rais Joan Laporta. Alipokea jezi yenye yenye nambari 431, ikiwakilisha idadi ya michezo aliyoichezea klabu hiyo.
