Kocha wa Tottenham Hotspur, Roberto De Zerbi, amemtangaza beki Micky van de Ven kuwa nahodha mpya wa timu hiyo kuelekea mchezo wao wa kwanza wa Ligi Kuu England dhidi ya Brentford utakaochezwa Jumamosi kwenye Uwanja wa Gtech Community Stadium. Van de Ven anachukua nafasi hiyo baada ya kuondoka kwa nahodha wa zamani, Cristian Romero.
De Zerbi amesema ameamua kuwa na kundi la viongozi watano ndani ya kikosi, akieleza kuwa Van de Ven atakuwa nahodha, akifuatiwa na Pedro Porro, Ben Davies, James Maddison na Archie Gray. “Nahodha mpya ni Micky van de Ven. Wa pili ni Pedro Porro, wa tatu Ben Davies, wa nne James Maddison na wa tano Archie Gray. Kwa nini watano? Kwa sababu nataka kuwa na manahodha wengi ndani ya uwanja ili hali na majukumu ya kila mmoja yawe wazi,” alisema De Zerbi.
Hata hivyo, Van de Ven hatashiriki mchezo dhidi ya Brentford kutokana na kutokuwapo kwenye kikosi kitakachocheza, huku Pedro Porro naye akikosekana. De Zerbi amethibitisha kuwa James Maddison, Dominic Solanke na Destiny Udogie watakuwepo, lakini Pape Matar Sarr hatacheza baada ya kupata maumivu. “Micky van de Ven hatakuwepo kesho, kama ilivyo kwa Pedro Porro. Pape Matar Sarr pia hatakuwepo. Amehisi maumivu leo kwenye nyama ya paja au sehemu ya makalio, lakini si jambo kubwa. Hatutaki kuchukua hatari naye kwa wakati huu,” alisema.
Akizungumzia shughuli za usajili, De Zerbi amedokeza kuwa Tottenham bado haijamaliza kazi kwenye dirisha la uhamisho, huku klabu hiyo ikihusishwa na wachezaji kadhaa akiwemo Savinho wa Manchester City. Tottenham tayari imefanya usajili mkubwa wa viungo Mateus Fernandes na Sandro Tonali. “Si sahihi kuzungumza kuhusu wachezaji hadi watakapokuwa rasmi. Ninachoweza kusema ni kwamba ninafuraha sana. Bado hatujamaliza kwenye soko la uhamisho,” alisema kocha huyo.
De Zerbi amesisitiza kuwa majina makubwa pekee hayatoshi kuipa Tottenham mafanikio, akitaka wachezaji wake waonyeshe tabia, dhamira na kiwango kinachohitajika kushinda. “Katika Premier League hushindi mechi kwa majina na wachezaji wakubwa. Kuna mifano mingi katika miaka ya hivi karibuni. Lazima ustahili kushinda mchezo, na ili ustahili kushinda tunapaswa kufikia kiwango sahihi cha tabia, nia, thamani na mtindo wa uchezaji,” aliongeza.
