Mshambuliaji wa Norway na Manchester City, Erling Haaland, ameweka historia mpya katika soka la kimataifa baada ya kufunga mabao mawili katika ushindi wa Norway wa 3-2 dhidi ya Denmark kwenye UEFA Nations League. Matokeo hayo yamemfanya kuwa mfungaji bora wa muda wote kwa wanaume kutoka eneo la Nordic katika historia ya soka la kimataifa.
Haaland sasa amefikisha mabao 64 katika mechi 56 alizoichezea Norway, akimpita nyota wa zamani wa Sweden, Zlatan Ibrahimović, aliyefunga mabao 62 katika mechi 122 za timu yake ya taifa. Haaland alikamilisha bao lake la pili dakika ya 74, likiipa Norway ushindi wake wa kwanza wa mashindano dhidi ya Denmark.
Kocha wa Norway, Ståle Solbakken, amemsifu Haaland akieleza kuwa uwezo wake wa kufunga mabao ni kitu ambacho si rahisi kufundishwa. “Haiwezekani kuelezea, wala haiwezekani kujifunza. Ameumbwa akiwa nao. Ni silika,” alisema Solbakken.
Kwa upande wa Denmark, mshambuliaji Rasmus Højlund amekiri ukubwa wa tishio linalotokana na Haaland. “Erling ana namna yake ya kuupata njia ya kufika kwenye goli. Kwa hiyo haishangazi, lakini wakati huo huo inanifadhaisha,” alisema Højlund. Denmark itapata nafasi ya kulipiza kisasi itakapomenyana tena na Norway katika mchezo wa mwisho wa hatua ya makundi ya Nations League, Novemba 17.
