Kocha wa Coventry City, Frank Lampard, amewataka wachezaji wake kuiga mfano wa Sunderland na Leeds United ili kufanikisha lengo la kubaki kwenye Ligi Kuu ya England msimu huu. Coventry, ambao walitwaa ubingwa wa Championship msimu uliopita, wanarejea Premier League kwa mara ya kwanza baada ya miaka 25 na wataanza kampeni yao kwa kucheza dhidi ya mabingwa Arsenal siku ya Ijumaa.
Lampard anaamini Coventry wanaweza kupingana na utabiri unaowapa nafasi kubwa ya kushuka daraja iwapo watajifunza kutoka kwa Sunderland na Leeds, ambao walifanikiwa kubaki Premier League msimu uliopita. Sunderland walimaliza nafasi ya saba huku Leeds wakishika nafasi ya 14. “Tumeangalia sana timu hizo mbili na namna zilivyocheza. Zinatupa msukumo, lakini ni sisi wenyewe tutakaotengeneza historia yetu,” Lampard alisema.
Ili kujiandaa na ushindani wa Premier League, Coventry wamefanya usajili wa wachezaji saba kwa gharama inayozidi pauni milioni 120, hatua iliyolenga kuongeza ubora na kina katika kikosi cha Lampard. Kocha huyo wa zamani wa Chelsea na timu ya taifa ya England alisema alifahamu ukubwa wa tofauti kati ya Championship na Premier League, hivyo klabu ililazimika kufanya kazi kwa umakini katika dirisha la usajili.
“Kila timu inayopanda daraja inajua kuna tofauti kubwa, na historia inatuonyesha hilo. Tulijua tulikuwa na kazi ya kufanya na tulijaribu kupata uwiano sahihi kwa kufanya mambo kwa busara na kimkakati,” Lampard alisema. Ameongeza kuwa ushindani mkubwa kwenye mazoezi na mechi utakuwa muhimu kutokana na kasi na ugumu wa Premier League.
Kupanda kwa Coventry kunakamilisha safari ya kipekee ya klabu hiyo, ambayo ilikumbwa na matatizo makubwa ya kifedha na kuingia katika usimamizi maalum mwaka 2013, huku ikilazimika kucheza baadhi ya mechi zake Northampton na baadaye kushirikiana uwanja na Birmingham City. “Ilikuwa mwaka mzuri kwetu na sherehe zilikuwa kubwa. Tukio hilo lilivuka mipaka ya mpira katika jiji hili,” Lampard alisema. “Nina furaha kubwa kuwa hapa baada ya klabu kukaa nje ya Premier League kwa miaka 25. Tunataka sasa kushindana na kufanya vizuri.”
