Paris Saint-Germain wanatarajiwa kupata nguvu mpya kabla ya mchezo wa marudiano wa robo fainali ya UEFA Champions League dhidi ya Liverpool.
Kocha wa PSG kutoka Hispania, Luis Enrique, alizungumza na waandishi wa habari katika kituo cha mazoezi cha klabu hiyo kilichopo Poissy, nje kidogo ya jiji la Paris, tarehe 7 Aprili 2026, kuelekea mchezo wa kwanza wa robo fainali ya Ligi ya Mabingwa Ulaya dhidi ya Liverpool.
The Reds wanatarajia kufanya moja ya miujiza mikubwa ya kihistoria barani Ulaya watakapowakaribisha PSG kwenye Uwanja wa Anfield kesho usiku. Liverpool wako nyuma kwa jumla ya mabao 2-0 baada ya kupokea kipigo kizito katika mji mkuu wa Ufaransa wiki iliyopita.
PSG ndio mabingwa watetezi wa Ligi ya Mabingwa Ulaya na wanachukuliwa na wengi kuwa timu bora zaidi barani Ulaya kwa sasa. Kutokana na kutokuwa na uthabiti kwa Liverpool msimu huu, watalazimika kutoa kiwango cha juu sana ili kugeuza matokeo ya mchuano huo.
Nguvu kubwa ya kikosi cha Luis Enrique ipo kwenye safu yao ya ushambuliaji. Desire Doue na Khvicha Kvaratskhelia walifunga mabao kwa Paris Saint-Germain katika mchezo wa kwanza, huku Ousmane Dembele mshindi wa tuzo ya Ballon d’Or mwaka jana akikosa nafasi ya wazi ya kufunga.
Kwa mchezo wa marudiano utakaochezwa Merseyside, PSG watapata nguvu zaidi kutokana na kurejea kwa Bradley Barcola. Winga huyo alifanya mazoezi kabla ya mchezo wa kwanza dhidi ya Liverpool, licha ya kuwa na tatizo la mishipa ya kifundo cha mguu. Hata hivyo, PSG hawakutaka kuhatarisha hali yake na wakampa wiki moja zaidi ya kujiandaa. Kutokana na hilo, mchezaji huyo wa kimataifa wa Ufaransa anatarajiwa kusafiri na kikosi cha Enrique na huenda akaanzia benchi, kwa mujibu wa L’Équipe. Barcola amefunga mabao 12 na kutoa pasi za mabao sita katika mechi 38 msimu huu.
PSG pia wamepata nafuu nyingine baada ya mchezo wao wa Ligue 1 dhidi ya wapinzani wa ubingwa RC Lens kuahirishwa mwishoni mwa wiki. Kwa upande wa Liverpool, walipata ushindi wa mabao 2-0 dhidi ya Fulham katika EPL.
Hata hivyo, The Reds wamempoteza Curtis Jones kutokana na majeraha ya paja la juu (groin), na kuna uwezekano mkubwa hatakuwepo dhidi ya PSG.
Kocha mkuu Arne Slot alisema: “Alianza kuhisi maumivu kidogo kwenye groin. Haikuwa ghafla, tayari alikuwa akihisi kwa dakika chache. Tutarajie yaliyo bora, lakini nitashangaa kama mchezaji aliyepata hali hiyo ataweza kucheza Jumanne. Karibu kwenye msimu wetu kila mara baada ya ushindi au jambo zuri, huwa kuna jeraha linafuata.”
Kipa namba moja wa Liverpool, Alisson Becker, ataendelea kukosekana kwani bado hajarejea mazoezini na timu.
“Kwa Jumanne simtarajii. Bado hafanyi mazoezi na timu. Lakini anafanya kazi kwa bidii sana katika kupona kwake, hivyo tunatumaini atarejea hivi karibuni. Hata hivyo, bado hafanyi mazoezi na timu, kwa hiyo hatakuwepo kwenye mchezo wa Jumanne.” alisema Arne Slot.
