Aliyekuwa kocha wa Tottenham Hotspur na sasa kocha mkuu wa timu ya taifa ya Marekani, Mauricio Pochettino, ametoa kauli ya kumuunga mkono mshambuliaji wa Bayern Munich, Harry Kane, akiamini anastahili kutwaa tuzo ya Ballon d’Or mwaka huu.
Pochettino, ambaye aliwahi kufanya kazi kwa karibu na Kane akiwa Tottenham, amesema kiwango kilichoonyeshwa na mshambuliaji huyo katika msimu uliopita kinamfanya kuwa mmoja wa wagombea wakuu wa tuzo hiyo. Kocha huyo anaamini Kane amefanya vya kutosha kuvutia kura za wapiga kura.
Akizungumza na Sky Sports, Pochettino amesema hana mashaka kuhusu uwezo wa Kane na anatumaini mshambuliaji huyo ataibuka mshindi katika hafla hiyo inayotarajiwa kufanyika jijini London, Oktoba 26, 2026.
“Nia yangu, na natumai ndivyo itakavyokuwa, ni kwamba atashinda. Nadhani anastahili tuzo hii kama zawadi ya kazi yake na yote aliyoyafanya kwenye soka,” alisema Pochettino.
Kane amekuwa akitajwa katika orodha ya wachezaji wanaowania Ballon d’Or baada ya kuwa na msimu wenye mafanikio akiwa na Bayern Munich na timu ya taifa ya England. Mshambuliaji huyo ameendelea kuonyesha uwezo mkubwa wa kufunga mabao na kutengeneza nafasi, jambo linalomfanya kuwa miongoni mwa majina yanayopewa nafasi kubwa.
