Santos FC imefikia makubaliano ya kumsajili kiungo mshambuliaji wa zamani wa Liverpool, Barcelona na Aston Villa, Philippe Coutinho, mwenye umri wa miaka 34. Mbrazil huyo anatarajiwa kujiunga na klabu hiyo kama mchezaji huru baada ya kukamilika kwa taratibu za mwisho.
Kwa mujibu wa taarifa za mtaalamu wa masuala ya usajili, Fabrizio Romano, Santos tayari imefikia makubaliano ya mdomo na Coutinho. Kinachosubiriwa sasa ni mchezaji huyo kufanyiwa vipimo vya afya kabla ya mkataba kusainiwa na kutangazwa rasmi.
Coutinho anatarajiwa kusaini mkataba wa muda mfupi ambao utamfanya kubaki Santos hadi mwisho wa msimu wa 2026. Ujio wake unaonekana kuwa nyongeza muhimu kwa kikosi hicho cha Brazil, hasa kutokana na uzoefu wake mkubwa katika soka la ndani na kimataifa.
Jina la Neymar pia limehusishwa na hatua hiyo, huku ikielezwa kuwa nyota huyo wa Santos amekuwa akifanya juhudi kuhakikisha Coutinho anajiunga naye tena. Wawili hao wamefahamiana kwa muda mrefu tangu walipokuwa wakicheza pamoja katika timu za taifa za vijana za Brazil.
Iwapo vipimo vya afya vitakamilika bila changamoto, Coutinho ataweka rasmi historia mpya katika maisha yake ya soka kwa kuvaa jezi ya Santos. Hatua hiyo pia itawapa mashabiki nafasi ya kumuona tena mmoja wa vipaji vilivyowahi kung’ara katika soka la Brazil na Ulaya.
