Kocha wa Senegal, Patrick Vieira, amesema bado kuna maeneo muhimu ambayo timu hiyo inahitaji kuyafanyia kazi licha ya kupata ushindi wake wa kwanza katika kampeni za kufuzu Kombe la Mataifa ya Afrika (AFCON) 2027 baada ya kuifunga Ethiopia 1-0 Jumanne kwenye Uwanja wa Bahir Dar International.
Senegal ilipata bao pekee la mchezo dakika ya 11 kupitia Ibrahim Mbaye, aliyefunga baada ya kuunganishwa vizuri na mshambuliaji wa Aston Villa, Nicolas Jackson. Baada ya mchezo wao wa kwanza kumalizika kwa sare ya 1-1 dhidi ya Mozambique, ushindi huo umeipa Senegal pointi muhimu katika mbio za Kundi L. Hata hivyo, Ethiopia ilipata nafasi kadhaa kutokana na makosa ya kiulinzi ya Senegal, lakini wenyeji hawakuweza kuzitumia.
Vieira amekiri kuwa Senegal ilipaswa kuwa na makali zaidi wakati ikiwa na mpira, hasa katika eneo la mwisho la uwanja. “Kwa ujumla, tulipokuwa na mpira tungeweza kufanya vizuri zaidi. Tulikosa kwa kiasi fulani ukali wa kushambulia, na hilo ni eneo tunalopaswa kulifanyia kazi,” Vieira alisema, huku akitaja pia hali ngumu ya uwanja kuwa moja ya changamoto katika mchezo huo.
Kocha huyo wa zamani wa Crystal Palace ameongeza kuwa mfumo mpya wa mchezo unaanza kujengwa na hivyo timu bado inahitaji muda kuufanyia kazi kikamilifu. “Kila kitu hakiwezi kuwa kamili kwa sasa. Bado tunapata picha ya maeneo tunayopaswa kuboresha. Ushindi dhidi ya Ethiopia umetupa kujiamini na naamini tupo kwenye njia sahihi,” alisema Vieira, ambaye pia aliwasifu wachezaji wake kwa kuvumilia vipindi vya presha kutoka kwa wenyeji.
Vieira amesema hatua inayofuata ni kuboresha namna Senegal inavyodhibiti vipindi vya presha pamoja na kuongeza nguvu katika mashambulizi ili kutumia vyema nafasi zinazotengenezwa. “Tunapaswa kuboresha namna tunavyosimamia vipindi vya presha na udhaifu, lakini pia tunahitaji kuwa wakali zaidi katika kushambulia ili kunufaika na nafasi tunazotengeneza. Kwa ujumla, nimefurahishwa na namna tulivyoweza kuvumilia vipindi vigumu,” aliongeza.
