Kocha wa Napoli, Antonio Conte, amesisitiza kuwa Rasmus Højlund bado ana nafasi kubwa ya kuimarika huku Partenopei ikiendelea kupambana kuhakikisha nafasi ya kucheza UEFA Champions League, jambo ambalo litafanya uhamisho wa kudumu wa Mdenmark huyo kutoka Manchester United kuthibitishwa moja kwa moja.
Napoli ilipata kipigo cha mabao 3-2 nyumbani dhidi ya Bologna Jumatatu, na kushindwa kuthibitisha rasmi kufuzu kwa UEFA Champions League ikiwa bado zimebaki mechi mbili.
“Ningependa kuwa na nafasi ya kumpumzisha kidogo. Ni kijana, ana nguvu nyingi, na kuna nyakati unatakiwa kushambulia nafasi, nyingine unatakiwa kushikilia mpira. Ana miaka 23 tu, anafanya kazi kubwa kwa ajili ya timu na bado ana nafasi ya kuendelea kuimarika.”
Rasmus Højlund amefunga mabao 14 katika mechi 42 kwenye mashindano yote msimu huu.
Mdenmark huyo yupo Napoli kwa mkopo kutoka Manchester United, lakini Napoli ina chaguo la kufanya uhamisho wake kuwa wa kudumu kwa euro milioni 44.
Chaguo la Napoli kumchukua moja kwa moja Rasmus Højlund litakuwa la lazima iwapo watatinga UEFA Champions League, lakini kwa sasa bado hawajathibitisha kumaliza ndani ya nafasi nne za juu huku zikiwa zimebaki mechi mbili pekee.
Mkurugenzi wa Napoli, Giovanni Manna, mara kadhaa amesema kuwa klabu hiyo itafanya uhamisho wa Hojlund kuwa wa kudumu majira ya kiangazi bila kujali kama watatinga UEFA Champions League au la.
Napoli bado ipo kwenye nafasi nzuri ya kufuzu UEFA Champions League, ikiwa nafasi ya pili kwenye msimamo wa ligi kwa tofauti ya pointi tatu dhidi ya AS Roma na AC Milan, ambazo zinalingana kwa pointi 67 katika nafasi ya nne.
Wikiendi ijayo, Partenopei watasafiri kucheza dhidi ya Pisa ambao tayari wameshuka daraja, kabla ya kumaliza kampeni yao nyumbani dhidi ya Udinese wikiendi ya Mei 24.
