Tottenham Hotspur watacheza nyumbani dhidi ya Everton Jumapili wakihitaji matokeo mazuri ili kuhakikisha wanabaki kwenye Premier League katika vita vya kujiokoa dhidi ya West Ham United, lakini Cristian Romero hatakuwepo.
Cristian Romero amewakasirisha mashabiki wa Tottenham Hotspur baada ya kubainika kuwa hatakuwepo katika mchezo wao wa kuamua hatma ya kushuka daraja mwishoni mwa wiki hii.
Nahodha huyo wa Spurs yuko nje kutokana na majeraha na ameamua kusafiri kurejea Argentina kwenda kuitazama klabu yake ya zamani mwishoni mwa wiki hii, badala ya kuwapa sapoti wenzake katika mchezo dhidi ya Everton.
Romero alipata jeraha la goti katika kipigo cha 1-0 cha Tottenham dhidi ya Sunderland mwezi uliopita, jambo lililomuweka nje ya mechi zilizobaki za msimu.
Kukosekana kwake kumekuwa pigo kubwa kwa kocha Roberto De Zerbi, lakini Spurs wamefanikiwa kupata pointi nane katika mechi tano zilizofuata, hali inayowapa matumaini ya kubaki kwenye Premier League.
Tottenham Hotspur wanaingia katika mchezo wao wa mwisho wa msimu nyumbani dhidi ya Everton huku hatma yao ikiwa mikononi mwao wenyewe, wakijua kuwa ushindi utawahakikishia nafasi ya 17 na kuwashusha daraja West Ham United walio nafasi ya 18.
The Hammers wana pointi mbili chini ya wapinzani wao wa London na watakuwa wenyeji wa Leeds United Jumapili.
Itakuwa Jumapili yenye presha kubwa na umuhimu wa hali ya juu kwa Tottenham, lakini Cristian Romero hatakuwepo jukwaani.
Badala yake, beki huyo atakuwa akiishangilia klabu yake ya zamani Belgrano watakapocheza dhidi ya River Plate katika pambano la ubingwa wa Argentina mwishoni mwa wiki hii.
Klabu hiyo ya mjini Córdoba iliweka video kwenye mitandao ya kijamii ikimuonyesha Romero akiwa katika uwanja wao wa mazoezi Ijumaa.
Uamuzi huo haujapokelewa vizuri kwenye mitandao ya kijamii, ambapo baadhi ya mashabiki wa Tottenham Hotspur wameuelezea kama “wa aibu.” Wengine wengi wamependekeza kuwa hii ni ishara ya mwisho wa safari ya Cristian Romero katika klabu hiyo, bila kujali kama watashuka daraja au la.
Romero amekuwa akihusishwa kwa nguvu na uhamisho kwenda Atlético Madrid msimu huu wa kiangazi, licha ya kuwa bado ana miaka mitatu kwenye mkataba mpya aliousaini mwaka jana.
Mchezaji huyo mwenye miaka 28 alijiunga na Spurs mwaka 2022 akitokea Atalanta na ameichezea klabu hiyo mechi 156.
Umuhimu wake kwenye kikosi ulisisitizwa na kocha Roberto De Zerbi alipothibitisha jeraha lake la kumaliza msimu mwezi uliopita.
“Romero, ninamuonea huruma sana kwa jeraha lake,” alisema De Zerbi. “Kwanza kabisa, Romero anaipenda Tottenham, watu wanapaswa kujua kwamba anaumia kwa jeraha hili, anaumia kwa sababu hawezi kucheza nasi tena msimu huu. Ni nahodha mkubwa kwetu.”
