De Bruyne Aikataa Fenerbahce Kwaajili ya Napoli

Kevin De Bruyne ameripotiwa kupokea uthibitisho kwamba Napoli wanatarajia kumuweka Antonio Conte kama kocha wao, huku Mbelgiji huyo akikataa ofa kubwa kutoka Fenerbahce na kuchagua kusaini na mabingwa wapya wa Serie A, Napoli.

Mtaalamu wa masuala ya uhamisho, Sacha Tavolieri, ameripoti taarifa mpya kuhusu mazungumzo kati ya De Bruyne na Napoli, akithibitisha kuwa nyota huyo wa Manchester City yuko karibu sana kujiunga rasmi na Partenopei.

Kocha huyo wa Kiitaliano alikutana na Rais wa Napoli, Aurelio De Laurentiis, siku ya Jumanne, na alichukua muda kabla ya kufanya uamuzi kuhusu mustakabali wake katika klabu hiyo ya Stadio Maradona.

Napoli wamezidi kupata matumaini kuwa Conte atasalia kuwa kocha wao, na mwandishi Matteo Moretto ameripoti kuwa klabu hiyo tayari imempa kocha wao mkataba mpya ulioboreshwa kama sehemu ya juhudi za kumbakisha.

Kwa upande wa De Bruyne, Tavolieri aliongeza kuwa klabu ya Kituruki, Fenerbahce inayofundishwa na José Mourinho, ilimtolea nyota huyo wa Manchester City ofa ya euro milioni 25 hadi mwaka 2027, lakini mchezaji huyo mwenye umri wa miaka 33 tayari amechagua kujiunga na Napoli.

Rais wa Napoli, Aurelio De Laurentiis, alithibitisha mapema wiki hii kuwa mazungumzo na De Bruyne yamekuwa mazuri, akieleza kuwa kiungo huyo wa City tayari amenunua nyumba nchini Italia.

“Ninajua kuwa tayari amenunua au tuseme, naamini kuwa tayari amenunua  nyumba nzuri sana. Asubuhi ya leo nilizungumza naye, pamoja na mke wake na mtoto wao wa miaka tisa kupitia video call,” alisema Rais huyo wa Napoli.

Alipoulizwa kama hilo lilikuwa tangazo rasmi la kusajiliwa kwa De Bruyne, De Laurentiis alijibu: “Hapana, hatuwezi kusema hivyo mpaka tuwe na kitu rasmi kwa maandishi. Sisi ni watu wa maana, hilo nalijua.”