Ethiopia imewasilisha rasmi ombi la kutaka kuwa mwenyeji wa Kombe la Mataifa ya Afrika, AFCON 2028, katika hatua inayoweza kuirejesha nchi hiyo kwenye jukwaa kubwa la soka la bara. Shirikisho la Soka la Ethiopia limesema ombi hilo linaloungwa mkono na serikali linaonyesha utayari kamili wa nchi hiyo kuandaa mashindano makubwa zaidi ya soka barani Afrika. Ethiopia imewahi kuwa mwenyeji wa AFCON mara tatu, mwaka 1962, 1968 na 1976, lakini safari hii inakabiliwa na mtihani mkubwa wa miundombinu, hasa kutokana na mahitaji makubwa ya mashindano ya timu 24.
Kwa sasa, suala kubwa linalotazamwa ni kama Ethiopia inaweza kuwa na viwanja vya kutosha vinavyokidhi viwango vya CAF kwa mashindano ya ukubwa huo. Msimu uliopita, nchi hiyo ilikuwa na uwanja mmoja pekee uliothibitishwa kutumika na CAF, ingawa kwa sasa inaendelea na maandalizi ya kuzindua uwanja mpya wa kimataifa pamoja na jengo kubwa la michezo mjini Addis Ababa. Uwanja huo unaweza kuwa miongoni mwa vituo vitakavyotumika katika AFCON, lakini bado kuna mashaka kuhusu uwezo wa nchi hiyo kuwa na viwanja vingine vinavyokidhi mahitaji ya kimataifa katika maeneo tofauti.
Bila kusahau meridianbet ndio wakali wa ODDS KUBWA, Machaguo zaidi ya 1000 na kila kitu ukitakacho. Bashiri kijanja hapa
Changamoto hiyo imeonekana pia katika safari ya Ethiopia kwenye mashindano ya kimataifa. Katika mechi zake za kufuzu Kombe la Dunia 2026, timu ya taifa ililazimika kutumia viwanja vya Morocco na Rwanda kama nyumbani kutokana na kutokuwa na viwanja vya kutosha vilivyokidhi viwango. Hata hivyo, mapema mwaka huu Ethiopia iliweza kuandaa baadhi ya mechi katika mji wa Dire Dawa. Kwa upande wa timu yenyewe, Walia Ibex ilifanikiwa kutwaa AFCON mwaka 1962 ilipokuwa mwenyeji, lakini tangu ilipoandaa mashindano mwaka 1976, imefuzu AFCON mara tatu pekee, huku ikishiriki mara ya mwisho mwaka 2021 na kumaliza mkiani mwa kundi bila ushindi.
Ethiopia sasa inaingia kwenye kinyang’anyiro ambacho kina ushindani mkubwa. Botswana, Namibia, Afrika Kusini na Zimbabwe tayari zimewasilisha ombi la pamoja kutoka Kusini mwa Afrika kwa ajili ya AFCON 2028, huku CAF ikisema imepokea maombi kadhaa yenye kuvutia kwa mashindano ya mwaka 2028, 2032 na 2036. Morocco, ambayo iliandaa AFCON 2025, imetajwa katika baadhi ya ripoti kama huenda ikarudi kuwa mwenyeji, lakini taarifa zinaeleza kuwa nchi hiyo haipo kwenye kinyang’anyiro na badala yake inaelekeza nguvu kwenye maandalizi ya Kombe la Dunia 2030.
Iwapo Ethiopia itafanikiwa kupata uenyeji wa AFCON 2028, itakuwa habari kubwa kwa soka la Afrika Mashariki na bara kwa ujumla, hasa baada ya Kenya, Tanzania na Uganda kupewa nafasi ya kuandaa AFCON 2027. Mashindano hayo yatafanyika kuanzia Juni 19 hadi Julai 17 mwakani, yakirejesha AFCON Afrika Mashariki kwa mara ya kwanza tangu ilipoandaliwa Ethiopia mwaka 1976. Kwa sasa, Ethiopia inahitaji kushawishi CAF kwamba maendeleo yake ya miundombinu yanaweza kuendana na ukubwa wa AFCON.
