Winga wa kimataifa wa Ureno, Rafael Leao, ameaga kwa hisia klabu ya AC Milan huku akiripotiwa kuwa karibu kujiunga na Galatasaray ya Uturuki. Leao amesema uamuzi huo haukuwa rahisi, lakini ataendelea kuwa sehemu ya historia ya klabu hiyo ya Italia.
Mchezaji huyo mwenye umri wa miaka 27, ambaye alianza soka katika akademi ya Sporting CP, ameichezea timu ya taifa ya Ureno mara 49 na kushiriki Kombe la Dunia la mwaka 2022 na 2026. Alijiunga na Milan mwaka 2019 akitokea Lille ya Ufaransa na baadaye kuwa mmoja wa wachezaji muhimu wa klabu hiyo.
Katika kipindi chake cha miaka saba San Siro, Leao amecheza mechi 291 katika mashindano yote, akifunga mabao 80 na kutoa asisti 65. Pia aliisaidia Milan kutwaa ubingwa wa Serie A msimu wa 2021/22 pamoja na Italian Super Cup msimu wa 2024/25.
Kwa mujibu wa taarifa mbalimbali za vyombo vya habari, AC Milan imekubali ofa ya €45 milioni kutoka Galatasaray kwa ajili ya kumnunua Leao, ambaye mkataba wake na Milan ulikuwa unaendelea hadi Juni 2028. Akizungumza baada ya Milan kuifunga Venezia 2-0 katika Serie A, Leao alisema: “Ni wakati mgumu. Nimewaaga wenzangu baada ya miaka saba. Milan imenisaidia kukua na kuelewa soka la kiwango cha juu linavyokuwa. Wakati umefika wa kusema kwaheri.”
Leao pia amewashukuru mashabiki wa Milan kwa kumuunga mkono katika nyakati zote, akisema: “Mashabiki waliniunga mkono hata katika nyakati ngumu. Najua kile nilichokifanya hapa na nimeacha alama katika historia ya klabu. Ninachoweza kufanya ni kusema asanteni.” Akizungumzia maisha yake baada ya kuondoka Milan, aliongeza: “Upendo wangu kwa Milan hautaisha. Hata nikiwa mbali, nitaendelea kuwaangalia. Kuna nyakati ambazo unatakiwa kufanya uamuzi na kuchagua njia tofauti.”
