Kevin De Bruyne anatarajiwa kurejea mazoezini na Napoli wiki ijayo baada ya mapumziko yake marefu kufuatia Kombe la Dunia la 2026. Hata hivyo, ripoti kutoka Italia zinaeleza kuwa nyota huyo wa Ubelgiji anaweza kupokelewa kwa hali ya baridi na baadhi ya wenzake, kutokana na kauli alizozitoa wiki chache zilizopita kuhusu aliyekuwa kocha mkuu wa Napoli, Antonio Conte.
De Bruyne ametimiza mwaka mmoja tangu ajiunge na klabu kwa uhamisho wa bure baada ya mkataba wake na Manchester City kumalizika. Mwanzo wake nchini Italia ulikuwa wa kuvutia, akifunga mabao manne katika mechi zake nane za kwanza za Serie A.
Hata hivyo, baadaye alipata jeraha kubwa la misuli ya nyuma ya paja (hamstring), lililomuweka nje ya uwanja kwa takribani miezi mitano.
Mwishoni mwa msimu, De Bruyne alicheza mechi 21 katika mashindano yote ya msimu wa 2025/26, akifunga mabao matano na kutoa pasi nne za mabao. Napoli ilimaliza katika nafasi ya pili kwenye Serie A nyuma ya Inter, ambao walitwaa mataji ya Serie A na Coppa Italia.
Antonio Conte, ambaye aliiongoza Napoli kutwaa ubingwa wa Serie A msimu wa 2024/25, aliamua kuondoka klabuni mwishoni mwa msimu wa 2025/26. Na kwa mujibu wa ripoti hizo, ni wazi kwamba De Bruyne alifurahia kuona Conte akiondoka.
“Kwa hakika ilikuwa vigumu kwangu kwa sababu Conte ana mtazamo wa soka ambao ni tofauti kabisa na wangu. Ukweli ni kwamba sikuwahi kupata nafasi ya kucheza katika nafasi ninayoipendelea,” alisema Kevin De Bruyne katika mahojiano aliyofanya mwishoni mwa mwezi Mei.
Alipoulizwa kama alifurahia kuona Conte akiondoka Napoli, De Bruyne alijibu: “Kwa upande wangu, ndiyo. Kwa mtazamo wangu, hakuwa na wajibu wa kubaki. Kulikuwa na ahadi zilizotolewa majira ya kiangazi yaliyopita kuhusu namna ambavyo tungecheza, lakini mwisho wa siku mengi ya hayo hayakutimia.”
Kauli hizo zimeibua mashaka kuhusu mustakabali wa De Bruyne ndani ya Napoli. Licha ya mkurugenzi wa michezo wa klabu hiyo, Giovanni Manna, kutoa uhakikisho hivi karibuni kwamba De Bruyne bado ana mkataba na Napoli na anaendelea kuwa “sehemu ya mradi wa klabu”, bado kuna hisia miongoni mwa wengi kwamba mahojiano yake makali ya mwezi Mei yalionyesha kiwango fulani cha kutomheshimu aliyekuwa kocha wake, Antonio Conte, pamoja na uongozi wa sasa wa klabu.
