Icardi Abakizwa PSG

Mabingwa wa ligi kuu ya Ufaransa ‘Ligue 1’, Paris Saint-German wamefanikiwa kumbakiza kikosini nyota wa timu ya taifa ya Argentina, Mauro Icardi na kumsainisha mkataba wa miaka minne. Dili hilo litamfanya Icardi aendelee kubaki PSG mpaka June 2024!

Nyota huyo wa kimataifa wa Argentina aliyeitumikia PSG tangu mwezi wa tisa mwaka jana akiwa kama mchezaji wa mkopo kutokea Inter Milan, ameonesha kiwango cha kuridhisha ndani kuu ya Ufaransa maarufu kama Ligue 1, na tayari amefanikiwa kuingia katika muunganiko mzuri uliozaa utatu mtakatifu wa Yeye (Icardi), Neymar na kylian Mbappe kiasi cha kutosha kuwashawishi mabosi wa PSG kutoa kitika cha zaidi ya pauni 54m ili kuinasa saini yake.

Hapo awali iliripotiwa kuwa PSG wangetakiwa kutoa zaidi ya pauni 60m ili kumsajili jumla nyota huyo katika kikosi chao, lakini hilo limekwamishwa kutokana na matokeo ya mlipuko wa janga la Corona na athari zake katika uchumi wa vilabu mbali mbali duniani.

Mauro Icardi mwenyewe anaonesha kuwa na furaha ndani ya PSG na mara kadhaa amenukuliwa akikiri hilo, sio tu na waandishi wa habari lakini pia na waliokuwa mabosi wake akiwa Inter. “Yeye (Icardi) anataka kuendelea kubaki PSG, sisi kama timu tupo katika mazungumzo ili kufanikisha hilo”, alinukuliwa Piero Ausilio, mkurugenzi wa michezo wa Inter Milan akisema kabla dili hilo halijakamilika.

Mpaka sasa nyota huyo wa Argentina ameshacheza jumla ya mechi 31 na kikosi cha PSG huku akiingia kambani mara 20! Icardi amekuwa mbadala sahihi kabisa wa nyota Edinson Cavanni aliyekuwa akiandamwa na majeraha.