Musiala amefichua kuwa anapata matibabu kutokana na hali ya absence seizures (vipindi vifupi vya kupoteza ufahamu) baada ya kuanguka uwanjani mara mbili ndani ya siku nne.
Mchezaji huyo mwenye umri wa miaka 23 alianguka wakati wa mchezo wa kirafiki wa maandalizi ya msimu dhidi ya Heidenheim siku ya Jumanne, muda mfupi baada ya kuingia kipindi cha pili kama mchezaji wa akiba.
Wachezaji wa timu zote mbili waliunda duara la kumlinda Musiala wakati akipewa huduma ya kitabibu uwanjani, kabla ya kuondoka mwenyewe. Tukio hilo lilifuata kuanguka kama huko Jumamosi wakati wa mchezo wa kirafiki dhidi ya RB Leipzig, ambapo mchezaji huyo wa timu ya taifa ya Ujerumani aliondoka uwanjani akiwa anaonekana kuchanganyikiwa.
Kupitia Instagram, Musiala alizungumza kutokana na wasiwasi ulioongezeka miongoni mwa mashabiki, akafafanua kuwa matukio hayo yanatokana na hitilafu katika mfumo wa neva. Aliwahakikishia mashabiki kwamba yuko chini ya uangalizi wa wataalamu wa afya na bado anaendelea kulenga kuendelea na maisha yake ya soka.
Akizungumza moja kwa moja na mashabiki, Musiala alieleza kwamba hali hiyo inaweza kudhibitiwa na haitarajiwi kuleta athari nyingine za muda mrefu kwa afya yake. Pia alithibitisha kwamba Bayern Munich pamoja na watu wake wa karibu wanafahamu kikamilifu kuhusu utambuzi huo.
“Ninaelewa kwamba wengi wenu mna wasiwasi. Ningependa kuondoa wasiwasi huo leo na kueleza hali ilivyo: Nimegundulika kuwa nina absence seizures za muda mfupi na zinazopita haraka, lakini zinaweza kutibiwa, na zinasababishwa na hitilafu katika mfumo wa neva. Hali hii inaweza kusababisha matukio kama yale yaliyoonekana hivi karibuni, kama wakati wa mchezo dhidi ya Leipzig au mchezo wa Heidenheim”. Musiala aliandika
“Najua kwamba yanaweza kuonekana ya kutisha unapoyaona kwa mara ya kwanza, lakini kwangu kwa sasa ni sehemu ya maisha yangu ya kila siku. Ninapata huduma bora ya kitabibu na bado nina matumaini makubwa. FC Bayern pamoja na watu wangu wa karibu wapo pamoja nami, wakinisaidia katika kipindi hiki.”
Mkurugenzi wa michezo wa Bayern Munich, Max Eberl, alithibitisha baada ya mchezo wa Jumanne kwamba uongozi wa klabu hiyo ulikuwa umefahamishwa kikamilifu kuhusu historia ya kiafya ya Musiala kabla hajaingia uwanjani. Tangu wakati huo, wataalamu wa afya wamempa ruhusa kiungo huyo kuendelea kucheza soka kwa usalama.
Aliongeza:“Muhimu zaidi, hakuna hatari nyingine ya kiafya inayohusika. Baada ya kushauriana kwa karibu na kuwa na mawasiliano ya mara kwa mara na wataalamu, ilikuwa ni uamuzi wangu binafsi kukabiliana na changamoto hii. Baada ya kupata ruhusa ya madaktari bingwa wa mfumo wa neva, nataka kuendelea kufanya kile kinachonisaidia zaidi katika kupona: kuendelea kuishi maisha yangu na kufuatilia shauku yangu ya kucheza soka. Nimechukua jukumu kamili la uamuzi huu. Kwa ujumla, najisikia vizuri sana na ninaelekea kwenye mwelekeo sahihi.”
Musiala ameomba faragha kuhusu matibabu yake yanayoendelea, akithibitisha kwamba anakusudia kushirikisha maelezo zaidi kuhusu hali hiyo na familia yake, klabu pamoja na wataalamu wa afya pekee.
Alisisitiza kwamba anaendelea kuwa na mtazamo chanya na kwamba amechukua jukumu kamili la uamuzi wake wa kuendelea kucheza soka.
Sasa Die Roten wanaelekeza nguvu zao kwenye mashindano rasmi, huku msimu mpya ukianza rasmi. Bayern watakutana na wapinzani wao wakubwa Borussia Dortmund Jumamosi katika German Supercup, mchezo ambao kwa kawaida huwa unaashiria mwanzo wa msimu wa mashindano ya ndani nchini Ujerumani.
