Kocha wa Italia Spalletti Alikuwa na Mzozo na De Laurentiis

Kocha wa Italia, Luciano Spalletti, anakiri kuwa alikuwa na “uhusiano wa kutatanisha” na Rais wa Napoli, Aurelio De Laurentiis, lakini atasalia kuwa “rafiki mkubwa” wa Francesco Totti.

Spalletti alizungumza kwa kifupi kuhusu maisha yake ya ukocha katika Roma na Napoli kupitia RAI 1, akijikita zaidi kwenye mahusiano yenye utata aliyowahi kuwa nayo.

“Hakuna jiji jingine lenye furaha na huzuni kama Naples. Nitaendelea kubeba furaha niliyoishuhudia huko,” Spalletti alisema kupitia Gazzetta.

Napoli walitwaa taji lao la kwanza la Serie A baada ya miaka 33 chini ya Spalletti msimu wa 2022-23, lakini kocha huyo aliachana na Stadio Maradona wiki chache tu baada ya kutwaa ubingwa huo wa kihistoria.

“Nilikuwa na uhusiano wa kutatanisha na De Laurentiis. Kwa kujitolea kwangu, ningependelea angeonyesha utu zaidi kwangu. Hatukuwahi kuzungumza tena tangu tulipoacha kufanya kazi pamoja.” Alikiri.

Vyanzo kadhaa viliripoti mwaka 2023 kuwa Spalletti hakuwa na furaha na mtazamo wa De Laurentiis, hasa pale Rais huyo alipofanya uamuzi wa kuendeleza mkataba wake kupitia barua rasmi na kavu ya kisheria.

Spalletti pia alishawahi kuibua vichwa vya habari kwa kuwa na uhusiano wenye mvutano na nahodha wa zamani wa Roma, Francesco Totti, ambaye hata alimtuhumu kocha huyo wa zamani kwa kumlazimisha kustaafu mwaka 2017. Hata hivyo, miaka michache baadaye, Totti na Spalletti waliweza kupatana tena.

“Nilipenda kufikiria kuwa hatima yangu ilikuwa mikononi mwa bingwa huyu mwenye miguu ya kimiujiza. Tulipoyasuluhisha mambo, bado kulikuwa na baadhi ya mambo niliyohitaji kuyasema, lakini tutaendelea kuwa marafiki wakubwa. Dakika chache za sintofahamu zilifanya tukose kuelewana, lakini daima nilifanya kila kitu kwa ajili ya Roma na sikuwahi kuwa na chuki binafsi dhidi ya mtu yeyote.” Spalletti alisema.

Timu ya Spalletti ya Italia itarejea uwanjani tarehe 6 Juni kwa mechi ya ufunguzi wa kufuzu Kombe la Dunia dhidi ya Norway.