Frank Lampard ametetea uamuzi wa Chelsea wa kutomruhusu Carney Chukwuemeka kujiunga na kikosi cha timu ya taifa ya Uingereza chini ya miaka 20 kwa ajili ya Kombe la Dunia nchini Argentina.
Mchezaji huyo mwenye umri wa miaka 19 ni mmoja wa wachezaji wawili wa klabu hiyo ambao wamezuiwa kwenye uteuzi wa meneja Ian Foster, huku kiungo wa kati Lewis Hall pia akiambiwa lazima abaki kwa muda uliosalia wa msimu.
Hall alianza wakati Chelsea ilipotoka sare na Nottingham Forest wikendi iliyopita na Lampard amedokeza kuwa atashiriki katika mechi tatu zilizosalia za timu yake, lakini Chukwuemeka ameanza mara mbili pekee tangu Desemba na hajakuwepo kwenye kikosi cha siku ya mechi kwa mechi yoyote kati ya nane zilizopita.
Lampard alisema kutokana na majeraha klabu hiyo iliona ni muhimu kumbakisha mchezaji huyo wa zamani wa Aston Villa, ambaye aliwasili Stamford Bridge kwa dau la pauni milioni 20 majira ya joto yaliyopita, kwa muda uliosalia wa msimu.
Lampard amesema; “Yeye ni mchezaji wa Chelsea na tumepata majeraha katika eneo hilo. Hali ya Carney ni kwamba amekuja katika klabu, ilikuwa hatua kubwa kwake, na msimu huu hajaweza kupata dakika nyingi. Anatulia katika klabu mpya.”
Kocha huyo anatumaini kuna nafasi katika michezo hii mitatu kwake na pia ni mchezaji wao, na wakati wamepoteza wachezaji wanamhitaji abaki.
Kuna uwezekano anaweza kujiunga mwishoni mwa msimu ikiwa timu itavuka hatua inayofuata. Lakini ni mchezaji wao na walipaswa kufanya uamuzi. Carney alikuwa na hamu ya kwenda, lakini wakati huo huo kilichotokea kilimaanisha kwamba alilazimika kubaki.
Chelsea itamenyana na mabingwa wapya wa Ligi Kuu ya Uingereza Manchester City leo hii ikiwa ni mechi ya kwanza kwa vijana wa Pep Guardiola tangu kuhifadhi taji waliloshinda katika kila misimu miwili iliyopita.
Ushindi wao wa tatu mfululizo wa taji ulithibitishwa na kichapo cha 1-0 cha Arsenal dhidi ya Nottingham Forest siku ya jana.
Hilo ni taji la tano kwa Guardiola tangu atue Uingereza mwaka 2016 na rekodi yake binafsi inaweza kuboreshwa zaidi mwezi Juni ikiwa City itaongeza Kombe la FA na Ligi ya Mabingwa na kutwaa mataji matatu.
Lampard, ambaye amepoteza mechi sita kati ya nane akiwa kocha wa muda wa Chelsea tangu ateuliwe mapema Aprili, aliulizwa kuhusu kufadhaika kwa kujitahidi kuiga mafanikio yake kama mchezaji tangu aanze kuinoa.
