Liam Rosenior Amefukuzwa Kazi na Chelsea Kufuatia Mfululizo Mbaya wa Matokeo ya Kupoteza.

Chelsea wamepoteza mechi zao tano zilizopita za ligi kufuatia kipigo cha 3-0 dhidi ya Brighton & Hove Albion Jumanne, hali iliyosababisha uongozi wa klabu hiyo kumfuta kazi Liam Rosenior.

Liam Rosenior alikuwa amepewa jukumu la kuiongoza Chelsea tangu Januari, lakini matokeo duni yameifanya timu hiyo kuingia kwenye kipindi kigumu. Kipigo hicho cha Amex kiliongeza mfululizo wa vipigo vitano mfululizo katika Premier League, huku Chelsea wakishindwa hata kufunga bao katika mechi zote tano jambo ambalo halijawahi kutokea tangu mwaka 1912.

Ingawa viongozi wa klabu walikuwa tayari kumpa muda zaidi, namna ya kupoteza dhidi ya Brighton ilionekana kuwa kikomo cha uvumilivu. Katika taarifa rasmi, Chelsea walithibitisha kuachana na Liam Rosenior na kumshukuru kwa juhudi zake, wakisisitiza kuwa uamuzi huo haukuchukuliwa kwa urahisi lakini ulilazimika kutokana na kushuka kwa kiwango cha matokeo na uchezaji.

Kwa sasa, Calum McFarlane atachukua nafasi ya kocha wa muda hadi mwisho wa msimu akisaidiwa na benchi la ufundi lililopo, huku klabu ikilenga kurejesha uthabiti na kupambana kufuzu michuano ya Ulaya pamoja na kusonga mbele kwenye FA Cup.

Chelsea watashuka dimbani tena Jumapili katika nusu fainali ya FA Cup dhidi ya Leeds United, kabla ya kumalizia msimu wa ligi kwa michezo dhidi ya Nottingham Forest, Liverpool, Tottenham Hotspur na Sunderland.