Nahodha wa Argentina, Lionel Messi, amechukua rasmi umiliki wa klabu ya Eldense inayoshiriki ligi daraja la pili nchini Hispania. Klabu hiyo ilithibitisha kukamilika kwa mchakato huo siku ya Alhamisi, hatua inayowakilisha tukio kubwa katika shughuli za kibiashara za nyota huyo mwenye umri wa miaka 39 nje ya uwanja.
Klabu hiyo yenye makao yake Alicante hapo awali ilikuwa inamilikiwa na kampuni ya uwekezaji ya Colombia, Grupo TH, ambayo pia ina hisa katika klabu mbalimbali nchini Colombia na Uswisi. Makubaliano haya yanakuwa mabadiliko ya tatu ya umiliki wa Eldense ndani ya kipindi cha mwaka mmoja.
Hata hivyo, dili hilo bado linasubiri idhini rasmi kutoka Baraza la Kitaifa la Michezo la Hispania (CSD). Baada ya kupata kibali hicho, hatua hiyo itaashiria mwanzo wa kipindi kipya chenye malengo makubwa kwa klabu hiyo inayoshiriki ligi daraja la pili nchini Hispania.
Ununuzi huu una umuhimu mkubwa kwa sababu Eldense ndiyo klabu ya kwanza ya kulipwa nchini Hispania ambayo Messi amewekeza. Ingawa mwanzoni mwa mwaka huu alininunua klabu ya daraja la tano, Cornella, timu hiyo bado inachukuliwa kuwa ya nusu-kitaalamu.
Katika taarifa rasmi iliyothibitisha makubaliano hayo, Eldense ilieleza matumaini makubwa kuhusu mmiliki wao huyo mpya mwenye jina kubwa. Klabu hiyo imeeleza kuwa gwiji huyo wa Argentina anaweza kuwa na mchango mkubwa katika kuleta mabadiliko na kukuza maendeleo yao ya baadaye.
“Kuwasili kwa mmoja wa watu muhimu zaidi katika historia ya michezo kwenye soka la kulipwa nchini Hispania, akiwa mmiliki wa CD Eldense, kunaashiria mwanzo wa mradi wa muda mrefu unaolenga kuendeleza klabu katika nyanja za michezo, taasisi na jamii,”Klabu hiyo ilisema.
