Liverpool: Msimu wa Kuvunja Rekodi

Baada ya kukabidhiwa rasmi kombe la EPL msimu huu. Liverpool wameweka rekodi yao na kuvunja rekodi zilizokuwepo katika Ligi Kuu Uingereza. EPL.

Matokeo ya ushindi wa Chelsea dhidi ya Manchester City yalitosha kumtangaza Liverpool kama bingwa wa EPL msimu huu akiwa bado amesalia na michezo 7 mkononi. Japokuwa, Liverpool alipaswa kusubiri mpaka mchezo wao wa mwisho katika uwanja wao wa nyumbani -Anfield ndipo watapokabidhiwa rasmi kombe hilo.

Ikumbukwe, mara ya mwisho kwa Liverpool kubeba kombe la EPL ilikuwa mwaka 1990 ambapo Kenny Daglish alikuwa kocha wa klabu hiyo. Daglish ambaye pia aliwahi kuichezea Liverpool michezo 515 na kufunga magoli 172 ndiye aliewavisha medali na kuwakabidhi kombe Liverpool baada ya mechi yao dhidi ya Chelsea walipoibuka na ushindi mnono wa goli 5-3.

Kutangaza ubingwa wakiwa na mechi 7 mkononi ni rekodi ambayo Liverpool wameiweka katika historia ya EPL. Timu pekee zilizowahi kufanya hivyo ni Manchester United mwaka 2000-01 na Manchester City mwaka 2017-18 ambapo timu zote hizi zilitangaza ubingwa wakiwa na mechi 5 mkononi.

Wakati Liverpool walipofikisha pointi 61 baada ya michezo 21, hiyo ni rekodi ya kipekee kutokea katika ligi zote kubwa barani Ulaya. Hakuna timu imewahi kufanya hivyo isipokuwa Liverpool pekee.

Japokuwa Liverpool wameweka rekodi zao kadhaa msimu huu, bado hawajaivunja rekodi ya Manchester City ya mwaka 2017-18 ya kufikisha pointi 100 katika msimu mmoja na kuchukua ubingwa wa EPL. Ushindi wa mechi ya mwisho kati ya Liverpool dhidi ya Newcastle United utampatia Liverpool pointi 3 na hivyo atamaliza msimu akiwa na pointi 99 pekee.