Quiñones Ang'ara Wenyeji Mexico Wakianza kwa Ushindi.

Mexico walianza kwa njia bora kampeni yao ya Kombe kubwa Duniani wakiwa wenyeji, huku Julián Quiñones aking’ara na kuiongoza timu hiyo kupata ushindi wa mabao 2-0 dhidi ya Afrika Kusini, ambao walimaliza mchezo wakiwa na wachezaji tisa.

Quiñones akicheza Kombe lake la kwanza baada ya kufunga mabao kwa wastani wa zaidi ya bao moja kwa mchezo akiwa na Al-Qadsiah ya Saudi Arabia msimu huu  alifungua ukurasa wa mabao wakati Mexico walipotumia makosa ya mguso wa kwanza wa Sphephelo Sithole kufuatia pasi fupi ya golikipa Ronwen Williams.

Ndani ya dakika tisa za mwanzo, Quiñones alipitisha mpira katikati ya miguu ya golikipa huyo wa Afrika Kusini na kufunga bao ambalo lilikuwa la mapema zaidi katika mchezo wa ufunguzi wa Kombe la michuano mikubwa hii tangu shuti kali la Philipp Lahm kwa Ujerumani dhidi ya Costa Rica mwaka 2006.

Licha ya kiwango chake bora katika ngazi ya klabu, hili lilikuwa bao lake la tatu pekee katika timu ya taifa ya Mexico na la kwanza tangu mwaka 2024.

Winga huyo mwenye umri wa miaka 29, ambaye aliwahi kuiwakilisha Colombia katika ngazi ya chini ya miaka 20 kabla ya kubadili uraia wa kisoka na kuichezea Mexico mwaka 2023, aliwasumbua sana mabeki wa Afrika Kusini kupitia upande wa kushoto.

Alipiga mashuti matano na kukamilisha chenga tano, takwimu ambazo zilikuwa nyingi zaidi kuliko mchezaji mwingine yeyote uwanjani katika Uwanja wa Estadio Azteca jijini Mexico City. Pia alikamilisha pasi 28 kati ya 33 alizojaribu, sawa na asilimia 85 ya mafanikio ya pasi.

Quiñones pia alikuwa na mchango mkubwa katika bao la pili la Raúl Jiménez kipindi cha pili. Kwa utulivu mkubwa, alimpa mpira Roberto Alvarado, ambaye baadaye alitoa krosi iliyomkuta Jiménez na mshambuliaji huyo mkongwe akaifunga kwa kichwa, akiandika bao lake la kwanza kabisa katika Kombe hili Duniani.

Alipotolewa uwanjani katika dakika ya 79, Julián Quiñones alishangiliwa kwa nguvu na mashabiki, baada ya kuonyesha kiwango kilichotosha kabisa kuimarisha nafasi yake katika kikosi cha Mexico kuelekea mechi yao ya pili ya Kundi dhidi ya Korea Kusini mjini Guadalajara Ijumaa ijayo (Juni 19).

Nyota huyo pia alionyesha kuwa ana uwezo wa kufanya mambo ya kipekee, baada ya kujaribu kwa ujasiri mkubwa kumpiga chenga golikipa Ronwen Williams kwa shuti la juu kutoka karibu na mstari wa katikati ya uwanja katika kipindi cha kwanza, jaribio lililoashiria ubunifu na kujiamini kwake mkubwa.