Imetangazwa kuwa Real Madrid watalipa ada ya rekodi ya klabu kwa Benfica ili kumteua Jose Mourinho kuwa kocha wao mpya.
Los Blancos walitangaza Jumanne kwamba kocha mkuu Álvaro Arbeloa ameondoka klabuni baada ya kudumu kwa miezi mitano pekee akiwa madarakani.
Kulikuwa na ripoti za kutokuelewana kati yake na baadhi ya wachezaji muhimu wa kikosi, huku Real Madrid wakimaliza msimu uliopita bila kushinda taji lolote.
Mourinho anatarajiwa kuwa na mamlaka makubwa zaidi ndani ya Real Madrid ikilinganishwa na Arbeloa, jambo ambalo litampa ushawishi mkubwa katika masuala ya usajili pamoja na maeneo mengine muhimu ya klabu.
Kwa mujibu wa ripoti, Mourinho aliwasilisha orodha ya madai 10 kwa rais wa klabu, Florentino Pérez, wakati wa mazungumzo ya awali kati yao.
Perez alikuwa ameahidi katika kampeni yake ya uchaguzi wa urais kwamba angemteua Mourinho kuwa kocha mpya wa klabu hiyo, huku makubaliano ya mkataba tayari yakiwa yamefikiwa.
Baada ya Pérez mwenye umri wa miaka 79 kushinda uchaguzi siku ya Jumapili kwa kupata asilimia 65 ya kura dhidi ya mpinzani wake Enrique Riquelme, Real Madrid sasa wanaweza kuendelea na hatua za mwisho za kurejea kwa Mourinho katika Uwanja wa Santiago Bernabéu kwa kipindi chake cha pili kama kocha wa klabu hiyo.
Akizungumza baada ya kuthibitishwa rasmi kuchaguliwa tena, Florentino Pérez alisema: “Tutaendelea kujivunia Uwanja wa Santiago Bernabéu, ambao ni uwanja bora zaidi duniani. Tunajivunia kuwa na wachezaji bora zaidi duniani, na tunajivunia kumkaribisha tena mmoja wa makocha bora zaidi duniani, Madridista wa kweli kama Jose Mourinho.”
Tutaendelea kufanya kazi ili kuhakikisha Real Madrid inaendelea kushinda mataji, na tutapambana hadi mwisho ili kutwaa Kombe la Ulaya la 16. Ni lazima tubaki wamoja, tukiongozwa na mapenzi yetu kwa Real Madrid. Kwa wale ambao hawakunipigia kura, nitafanya kila niwezalo kushughulikia wasiwasi wao. Alisema kocha huyo.
Mourinho anatarajiwa kutambulishwa rasmi na Real Madrid baadaye wiki hii, lakini Benfica tayari wamechukua hatua ya kuthibitisha kuwa mabingwa hao wa Hispania wamewasiliana nao na kuthibitisha kuwa watalipa kipengele cha kumwachilia kocha huyo.
Real Madrid watalipa fidia ya euro milioni 15 ili kumteua Mourinho, kiasi ambacho ni ada ya rekodi katika historia ya klabu kwa ajili ya kumchukua kocha, na ni klabu mbili pekee katika historia ya soka zilizowahi kulipa zaidi ya kiasi hicho.
Uteuzi wa Julian Nagelsmann na Bayern Munich bado unashikilia rekodi ya dunia kwa ada ya fidia ya kocha, huku Chelsea wakilipa kiasi kikubwa cha fedha katika vipindi tofauti vya umiliki wa klabu ili kuwateua Graham Potter na André Villas-Boas.
Taarifa kutoka Benfica ilisomeka: “Benfica SAD imeiarifu CMVM (Tume ya Masoko ya Mitaji ya Ureno) kwamba Real Madrid CF imewasilisha rasmi nia yake ya kumwajiri Jose Mourinho kwa kiasi cha euro milioni 15, huku kocha huyo akiwa tayari ametoa idhini yake.”
