Real Madrid: Mkataba Mpya kwa Luka Modric

Klabu ya Real Madrid inaripotiwa kuwa wanajiandaa kumpatia Luka Modric ofa mpya ya mkataba wa mwaka mmoja zaidi na klabu hiyo.

Nyota huyu mwenye miaka 35, anatarajia kumaliza mkataba wake wa sasa msimu ujao wa joto. Staa huyu atakuwa huru kusaini makubaliano ya awali na klabu nyingine yeyote ya nje ya Hispania ifikapo mwezi Januari.

Modric alikuwa sehemu muhimu ya kikosi cha Madrid kwa msimu wa 2019-20 wa La Liga walipofanikiwa kutwaa taji. Kwa msimu huu, amecheza mechi tatu tu za ligi klabuni hapo.

Kwa mujibu wa vyanzo vya habari za michezo Hispania, Real Madrid wanafikiria kumpatia Modric mkataba mwingine utakaomuweka klabuni hapo hadi mwaka 2022.

Modric amewachezea Madrid jumla ya mechi 347 tangia alipojiunga na klabu hiyo kutokea Tottenham mwaka 2012, amefunga magoli 22 na kutoa asisti 55.

Kiungo huyu alicheza dakika zote za mechi za Croatia kwenye Ligi ya Mataifa UEFA dhidi ya Sweden na Ufaransa Oktoba 11 na Oktoba 14.