Safari ya Kusisimua ya Arsenal Kumaliza Ligi Bila Kufungwa 2003/2004

Wakati matukio yote hayo yakija na mikakati ya kumwanga watu machozi. Mwaka 2003 Arsenal wao waliamua kupiga tukio la kuishtua dunia pasipo kuwahuzunisha watu. Walianza safari yao ya kucheza msimu mzima pasipo kupoteza mechi. Japo ilikuwa kama ndoto za Alinacha, walifika stand salama May 2004. Ligi ya timu 20, mechi 38 bila kupoteza hata moja.

Si Chelsea ya Claude Makelele na Frank Lampard, wala Liverpool ya Michael Owen na Steven Gerrard zilizopona. Walipigwa nje-ndani. Man United ya akina Ruud Van Nistelrooy walinusurika. Wakapewa sare mbili. Labda watoto wa juzi hawajui ile Arsenal, ngoja niwasimulie kidogo.

Alikuwepo mtu aitwaye Thierry Henry. Aliliona goli mara mbili zaidi ya binadamu wa kawaida, ni kama alikuwa ana macho manne. Mabao 30 msimu ule, nafasi ya pili kwenye ballon d’or. Ulitaka afanye nini cha ziada ili umkubali? Sitaki kumzungumzia mpishi Robert Pires na ile winga ya kushoto, sitaki kabisa kuyazungumzia mabao 14 aliyofunga ule msimu. Wala sitaki kumzungumzia muholanzi asiyepanda ndege, Denis Berkgamp.

Nataka kumzungumzia Adolf Hitler wa Ufaransa, Patrice Vierra. Mimi napenda kumuita ‘shetani wa dimba la chini’. Alibeba kila aina ya uchafu. Alikuwa na Arsenal wakati haina mpira, alipoupata aliikabidhi kwa “mchora ramani” Fred Ljunberg. Ljunberg akaifikisha Arsenal mbele.

Arsenal walikuwa na ukuta wa chuma wa Ashley Cole, Kolo Toure, Sol Campbell na Laureano Bissan. Waliruhusu mabao 26 tu msimu mzima. Ngome imara zaidi ya Chief Mkwawa wa wahehe pale Iringa.

Vile ndivyo Invicibles Arsenal ilivotokea. Baada ya Preston msimu wa 1888-89, haikuwahi kutokea invicibles nyingine ndani ya epl. Arsenal ndio waliirudisha.