Sandakalawe Saini ya Kylian Mbappe

Kylian Mbappe ameamsha tena minong’ono juu ya hatma yake pale PSG. Hii ni kufuatia kauli yake aliyoitoa juu ya watu ambao anawachukulia kama mifano kwenye soka. Mpaka sasa Kylian Mbappe anahusishwa na klabu ya Real Madrid na Liverpool huku PSG wakijaribu kumuongezea mkataba kusalia klabuni hapo.

Mkataba wa sasa wa Mbappe na PSG unaisha mwaka 2022, hatma yake klabuni PSG imeendelea kuwa na sintofahamu huku ripoti zikitaja kuwa staa huyu haonekani kuwa na mpango wa kuongeza mkataba klabuni hapo.

Madrid wanatajwa kuwa wanapanga kufanya kila wawezalo kuinasa saini yake na wameamua staa huyu awe kipaumbele katika dirisha la uhamisho linalokuja.

Inakumbukwa kuwa Mbappe alishawahi kusema kuwa atakuwa wazi kusaini mkataba na Real Madrid katika siku zijazo. Lakini katika kuwataja wachezaji wake anaowakubali zaidi katika soka ameibua hisia tofauti baada ya kutaja kuwa meneja Zinedine Zidane, akifuatiwa na Cristiano Ronaldo ndiyo watu wanaomvutia zaidi na angependa kuacha nyayo kama zao.

Minong’ono inayoendelea sasa ni kuwa nani atakayeinasa saini yake? Je ni PSG wanaojitahidi kumshawishi kuongeza mkataba au ni Real Madrid ambako alikuwa anatamani kuwepo ili amfuate moja ya “Icon” wake katika soka, ama ni Liverpool ambao pia wamehusishwa naye kwa mda na wakijipanga kumleta kinda huyu wa miaka 21 kwenye Ligi ya Uingereza.

“Wa kwanza alikuwa ni Zidane, kwa kila kitu alichofanikiwa akiwa na timu ya taifa, na pia anakuja Ronaldo. Wote wameacha alama kubwa katika historia ya mchezo. Na ninataka kuacha kurasa zangu kwenye vitabu vya historia” -Mbappe

Kwa upande wa Liverpool, Klopp ambaye anapenda kumtaja Mbappe kama “Mashine” anatarajia kumnasa staa huyu hasa baada ya klabu hiyo kuhusishwa na kampuni ya Nike, ambao wanafikiriwa kuwa wanaweza kudhamini uhamisho wa staa huyu.

Hapa tunasema saini ya Mbappe sasa ni Sandakalawe! Mwenye kupata apate, huenda PSG wakafanikiwa kumbakiza au Liverpool wakafanikia kumshawishi au akamfuata Icon wake Zidane.