Tottenham Hotspur wako tayari kuwasilisha ofa ya euro milioni 65 (takribani pauni milioni 56) kwa ajili ya kumsajili beki wa Barcelona, Jules Koundé, kwa mujibu wa ripoti kutoka Hispania.
Spurs tayari wametumia karibu pauni milioni 230 katika dirisha hili la usajili. Kati ya fedha hizo, walilipa pauni milioni 52 kumsajili Jan Paul van Hecke. Yeye ni mmoja wa mabeki watatu waliosajiliwa, sambamba na Marcos Senesi na Andy Robertson, ambao walijiunga kwa uhamisho wa bure.
Inaonekana kocha Roberto De Zerbi amekamilisha kwa kiasi kikubwa maboresho ya safu yake ya ulinzi, hasa baada ya kueleza wazi kuwa sasa anataka kuimarisha eneo la ushambuliaji.
Alisema:”Ndiyo, lengo letu sasa ni kukamilisha nafasi za ushambuliaji. Tunahitaji wachezaji wa kiwango cha juu kwa sababu tayari tuna wachezaji muhimu.Lakini ili kuanza mradi mpya, tunahitaji kuongeza angalau wachezaji wengine wawili muhimu.”
Hata hivyo, ripoti kutoka Hispania zinaeleza kuwa Tottenham bado wanamfikiria beki mmoja zaidi, ambaye ni Jules Koundé wa Barcelona.
Inaelezwa kuwa Spurs wako tayari kuwasilisha ofa ya euro milioni 65 (pauni milioni 56) kwa beki huyo mwenye uwezo wa kucheza kama beki wa kulia na pia beki wa kati.
Zaidi ya hayo, Tottenham wanamwona Koundé kama chaguo bora kutokana na uwezo wake wa kucheza katika nafasi zote mbili kwa kiwango cha juu.
Ripoti zinaongeza kuwa kiasi hicho cha euro milioni 65 ndicho ambacho Barcelona inaweza kuwa tayari kukubali ili kumruhusu beki huyo wa kimataifa wa Ufaransa kuondoka.
Iwapo Koundé atajiunga na Tottenham, ataunda safu ya ulinzi pamoja na beki wa Uholanzi, Micky van de Ven. Van de Ven amesema ameridhishwa na usajili ambao klabu imefanya hadi sasa katika dirisha hili.
Alisema: “Ni jambo zuri kuona kwamba klabu imefanya mabadiliko. Wamemleta kocha mpya mzuri sana, kwa maoni yangu, pamoja na wachezaji wapya wenye ubora mkubwa. Unaweza kuona kwamba klabu sasa ina malengo mapya makubwa. Hilo ni muhimu sana kwa wachezaji ambao wamekuwa hapa kwa muda mrefu.”
