Mshambuliaji wa Italia Sebastiano Esposito alieleza kuridhishwa na kiwango cha nidhamu kilichoonyeshwa na timu yake baada ya kupata sare ya 1-1 dhidi ya Ufaransa kwenye Uwanja wa Stade de France. Licha ya Ufaransa kutawala asilimia 65 ya umiliki wa mpira, Italia iliendelea kuwa tishio na kusawazisha bao la Michael Olise kupitia Alessandro Bastoni.
Esposito aliongoza safu ya ushambuliaji kwa kutumia nguvu na juhudi kubwa, huku kikosi cha Roberto Mancini kikifanikiwa kuzuia mashambulizi ya Ufaransa.
Akizungumza na UEFA baada ya mchezo, Esposito alisisitiza kuwa kupata sare ugenini dhidi ya Ufaransa ni hatua nzuri kwa kikosi cha Italia kinachoendelea kujengwa. Alikiri ukubwa wa jukumu la kuvaa jezi ya timu ya taifa, huku akiwaomba mashabiki kuwa na subira wakati wachezaji wapya wakiendelea kuzoeana.
“Nadhani tulicheza vizuri katika ulinzi na ilikuwa ni matokeo mazuri sana dhidi ya timu nzuri sana. Ukija hapa na kupata sare, si matokeo mabaya hata kidogo. Najua sisi ni Italia na tunataka kushinda kila mchezo kutokana na historia yetu. Tulicheza vizuri, na bado tunaweza kufanya vizuri zaidi, lakini tunahitaji muda.” Esposito aliiambia UEFA
Akilinganisha kiwango cha hivi karibuni cha timu, Esposito alisema Italia imeonyesha maendeleo makubwa ikilinganishwa na michezo ya awali ya kundi dhidi ya Ubelgiji. Alisisitiza kuwa kikosi hicho kina ubora wa kutosha kushindana katika kiwango cha juu cha soka la kimataifa pale kinapotekeleza maagizo ya kocha kwa usahihi.
Esposito anaendelea kuamini katika mwelekeo wa muda mrefu wa timu hiyo. “Tunaanza na kocha mpya na wachezaji wapya, Labda dhidi ya Ubelgiji hatukucheza vizuri sana, lakini tangu hapo tumeimarika na tunajaribu kucheza. Hili ni muhimu kwetu. Tuna ubora na tunapaswa kuendelea katika mwelekeo huu.” Esposito aliongeza.
