Kocha wa Ufaransa, Didier Deschamps, anatabiri kuwa nusu fainali ya Taji la Dunia dhidi ya Hispania itakuwa mechi ya “kusisimua sana” wakati mataifa hayo mawili makubwa yatakapokutana jijini Dallas siku ya leo.
Hispania iliifunga Ufaransa katika nusu fainali ya Euro 2024 kabla ya kutwaa ubingwa wa Ulaya, na mwaka uliofuata ikaishinda tena Les Bleus katika mchezo wa kusisimua wa mabao tisa kwenye nusu fainali ya UEFA Nations League.
“Yaliyopita yamepita,” alisema Deschamps, ambaye ataondoka kwenye nafasi yake ya ukocha baada ya miaka 14 mara tu mashindano haya yatakapomalizika. Ni kweli walitufunga hapo nyuma, lakini sasa ninaitazamia mechi ya kesho. Sasa tuko katika kiwango kingine. Tunataka kufika fainali.”
Iwapo Ufaransa itaibuka na ushindi nchini Marekani, itakuwa taifa la tatu pekee katika historia kufuzu fainali tatu za Taji la Dunia mfululizo.
Mataifa pekee yaliyowahi kufanya hivyo ni Ujerumani Magharibi (1982, 1986 na 1990) pamoja na Brazil (1994, 1998 na 2002).
Deschamps, aliyekuwa nahodha wa Ufaransa ilipotwaa Taji la Dunia mwaka 1998, aliiongoza pia timu hiyo kutwaa ubingwa mwaka 2018 kabla ya kupoteza kwa mikwaju ya penalti dhidi ya Argentina katika fainali ya mwaka 2022 nchini Qatar.
Pamoja na kujiamini, Deschamps amesema anaamini Hispania ndiyo inayoingia kwenye mchezo huo ikiwa ikipewa nafasi kubwa zaidi ya kushinda.
“Wameruhusu bao moja tu katika mechi sita walizocheza. Tunajua huu unaweza kuwa mchezo wa kusisimua sana. Mimi na Luis de la Fuente tunajua jinsi ya kupanga ulinzi, lakini pia kutokana na ubora wa timu zote mbili katika kushambulia, tunaweza kutarajia mechi yenye burudani kubwa.”
Kwa upande wake, kocha wa Hispania Luis de la Fuente alipuuza kauli ya Deschamps kwamba Hispania ndiyo inapewa nafasi kubwa ya kushinda.
“Hilo halimaanishi chochote. Hizi ni timu mbili kubwa zinazokutana. Kama sisi ni mabingwa wa kubashiriwa au la, hilo halituongezei presha. Tayari tunayo presha ya kutaka kufanya vizuri kwa ajili ya taifa letu,” alisema De la Fuente.
Ufaransa imefunga mabao 16 katika mechi sita za Taji la Dunia 2026, huku Kylian Mbappé akifunga mabao nane kati ya hayo na pia akitoa pasi tatu za mabao.
Nahodha huyo wa Ufaransa atamzidi Lionel Messi wa Argentina, ambaye pia ana mabao nane, katika mbio za kuwania tuzo ya Golden Boot iwapo atafunga dhidi ya Hispania katika mchezo wa nusu fainali.
“Tunajua wana wachezaji bora, lakini sisi pia tunao wachezaji wa kiwango cha juu. Bila shaka tutalazimika kuwafikiria wachezaji kama Mbappé, Ousmane Dembélé na Michael Olise. Tunapaswa kushinda mapambano yetu binafsi uwanjani, kucheza kwa ujasiri na kuendelea kushikilia mtindo wetu wa soka.”Alisema kocha wa Hispania, Luis de la Fuente.
“Kesho itakuwa mechi yenye ushindani mkubwa na itahitaji kiwango cha juu sana.”
Katika mkutano wake na waandishi wa habari jijini Dallas, De la Fuente alinukuu kauli maarufu ya jenerali wa Kirumi, Julius Caesar.
“Julius Caesar aliwahi kusema huwezi kushinda bila kupitia mateso. Nakubaliana kabisa na kauli hiyo,” alisema kocha huyo mwenye umri wa miaka 65.
“Hii ni moja ya kauli ninazozipenda sana. Kama unataka kufanikisha mambo makubwa maishani, lazima uwe tayari kupitia changamoto na kujitoa kwa hali na mali.”
