Hong Myung-bo amejiuzulu kama kocha mkuu wa timu ya taifa ya wanaume ya Korea Kusini baada ya timu hiyo kushindwa kufuzu hatua ya mtoano ya Taji la Dunia.
Timu hiyo ilikuwa na matumaini ya kufuzu kama moja ya timu bora zilizomaliza nafasi ya tatu kwenye makundi, lakini matumaini hayo yalifutika Jumamosi.
Kutolewa mapema kumezua ukosoaji mkubwa nchini humo, huku Rais Lee Jae-myung akiagiza kufanyika uchunguzi kuhusu sababu zilizopelekea timu kufanya vibaya kwenye mashindano hayo.
Hong aliomba radhi kwa mashabiki Jumapili na kusema kuwa “jukumu lote liko juu yangu kama kocha mkuu.”
Korea Kusini, ambayo ipo nafasi ya 32 kwenye viwango vya FIFA kwa soka la wanaume na inaongozwa na nyota Son Heung-min, ilipata ushindi mmoja na vipigo viwili kwenye Taji la Dunia, ikimaliza nyuma ya Mexico na Afrika Kusini, ambazo zipo nafasi ya 15 na 60 mtawalia katika viwango vya FIFA.
Ukosoaji uliongezeka haraka baada ya mchezo wa mwisho dhidi ya Afrika Kusini Alhamisi, ambapo Korea Kusini ilifungwa bao 1-0.
Kipigo hicho kiliifanya Korea Kusini kumaliza nafasi ya tatu katika Kundi A, lakini bado kikawapa matumaini ya kufuzu kutokana na sheria mpya iliyoanzishwa kufuatia kupanuliwa kwa Taji la Dunia kutoka timu 32 hadi 48, ambayo inaruhusu timu nane bora zilizomaliza nafasi ya tatu katika makundi kufuzu hatua ya mtoano.
Akizungumza kwenye mkutano na waandishi wa habari magharibi mwa Mexico alipotangaza kujiuzulu kwake, Hong alisema: “Hatukuweza kupata matokeo ambayo mashabiki wetu walitarajia.”
“Ingawa ninaondoka kwenye timu ya taifa, siachi kabisa soka la Korea,” alisema Hong. “Nitaendelea kuiunga mkono timu ya taifa kutoka moyoni mwangu na nina matumaini kuwa itarejesha imani na upendo wa wananchi kwa mara nyingine.”
Tangazo hilo lilikuja baada ya Rais Lee Jae-myung kusema kuwa alihisi “si mkanganyiko tu, bali mshangao mkubwa” kutokana na matokeo yasiyotarajiwa.
Katika ujumbe aliouchapisha kwenye X, Lee alisema kutolewa mapema kwa timu hiyo “kunaonekana kuwa ni matokeo ya kushindwa kwa uongozi na maamuzi ya uteuzi wa viongozi.”
“Pale ambapo upendeleo na undugu vinawekwa mbele kuliko uwezo katika kumchagua kiongozi, matokeo yake huwa ni ya kutarajiwa kama vile moto unavyoteketeza karatasi,” alisema.
Kuteuliwa kwa Hong kama kocha mkuu kulizua mjadala tangu mwanzo. Beki huyo wa zamani alikuwa shujaa wa mafanikio ya Korea Kusini katika Taji la Dunia la mwaka 2002, baada ya kuiongoza timu kama nahodha hadi hatua ya nusu fainali kwa mara ya kwanza katika historia yake.
Hata hivyo, alipokuwa kocha wa timu hiyo mwaka 2014, Korea Kusini ilishindwa kuvuka hatua ya makundi na haikushinda hata mechi moja.
Hong aliporejea tena kwenye nafasi hiyo mwaka 2024, uteuzi wake ulipokelewa kwa upinzani mkali. Mashabiki wengi walikosoa uamuzi huo wakidai viongozi wa Shirikisho la Soka la Korea (KFA) waliwapa nafasi marafiki zao badala ya kuchagua kwa misingi ya uwezo, huku wakipuuza makocha kadhaa wa kigeni waliokuwa wamepitia mchakato wa kina wa usaili.
Siku ya Jumapili, Hong alisema kuwa “kukubali kazi hiyo halikuwa jambo rahisi. Siwezi kusema kila uamuzi nilioufanya ulikuwa sahihi, lakini ninaweza kusema kuwa kila uamuzi nilioufanya ulikuwa kwa maslahi ya soka la Korea,” aliongeza.
Wakati huo huo, polisi wa Korea Kusini wamesema wanaimarisha ulinzi katika Uwanja wa Ndege wa Incheon na maeneo mengine baada ya kutolewa kwa tishio la kumuua Hong kupitia mtandao, alipokuwa akitarajiwa kurejea nchini mwishoni mwa wiki, kwa mujibu wa vyombo vya habari vya nchini humo.
