Arsenal wamefanya mawasiliano ya awali (“calls”) kwa ajili ya kumsajili Yan Diomande, huku mwandishi wa masuala ya usajili Fabrizio Romano akifichua kila kilichojiri kuhusu winga huyo wa RB Leipzig baada ya Real Madrid kuwasilisha ofa ya euro milioni 100.
Diomande ana umri wa miaka 19 pekee, lakini tayari amekuwa mmoja wa mawinga wanaowindwa zaidi duniani. Mapema katika dirisha hili la usajili, Liverpool iliwasilisha ofa ya euro milioni 100 (euro milioni 80 pamoja na nyongeza ya euro milioni 20), lakini baadaye ikaamua kujiondoa kwenye mbio za kumsajili baada ya Diomande kuonyesha wazi nia yake ya kujiunga na PSG.
Baadaye, nyota huyo raia wa Ivory Coast alikubaliana masharti binafsi na mabingwa wa Ligue 1, PSG, kwa mkataba wa miaka mitano utakaodumu hadi mwaka 2031.
Hata hivyo, hadi sasa PSG imeshindwa kufikia makubaliano na RB Leipzig kuhusu ada ya usajili, licha ya pande hizo kufanya mazungumzo ya kina kwa muda mrefu.
Hali hiyo imeziacha milango wazi kwa vilabu vingine kuingia kwenye mbio za kumsajili Diomande, na idadi ya wanaomuwania ni kubwa.
Ijumaa usiku, taarifa ziliibuka kuwa Real Madrid imewasilisha ofa ya euro milioni 100 kwa ajili ya kumsajili winga huyo. Ofa hiyo ilikuwa na thamani sawa na ile ambayo Liverpool iliwasilisha awali, lakini iliundwa kwa namna iliyokuwa na manufaa zaidi kwa Leipzig, ikijumuisha euro milioni 90 za uhakika pamoja na euro milioni 10 za nyongeza kulingana na masharti ya utendaji (add-ons).
Hata hivyo, ofa hiyo pia imekataliwa. Mwanahabari Ben Jacobs ameripoti kuwa Leipzig inahitaji kiasi cha takribani euro milioni 130, huku ikitaka sehemu kubwa ya fedha hizo iwe ya uhakika badala ya kutegemea nyongeza za baadaye.
Ben Jacobs aliandika kwenye mtandao wa X:”Pendekezo la Real Madrid kwa Yan Diomande lilikuwa euro milioni 90 pamoja na euro milioni 10 za nyongeza, na tayari limekataliwa.
“Real Madrid bado inaendelea na mazungumzo. Leipzig inataka takribani euro milioni 130 (huenda zote ziwe fedha za uhakika), na pia imekumbusha kwamba Florentino Pérez aliwahi kufanya kampeni akiahidi usajili wa thamani ya euro milioni 150. Ofa hiyo si sawa kabisa na ile ya mwisho ya Liverpool iliyokataliwa, ambayo ilikuwa euro milioni 80 pamoja na euro milioni 20 za nyongeza.”
Baada ya ofa ya Real Madrid kukataliwa na PSG kuonekana kusuasua katika mazungumzo, mlango bado uko wazi kwa vilabu vingine vikubwa kuingia kwenye mbio za kumsajili Yan Diomande.
Akiandika kupitia mtandao wa X, mtaalamu wa taarifa za usajili Fabrizio Romano amethibitisha kuwa Arsenal na Manchester City zimefanya mawasiliano (“calls”) katika siku 10 zilizopita ili kuchunguza uwezekano wa kumsajili Diomande.
Hata hivyo, inaonekana hakuna klabu kati ya hizo mbili iliyo karibu kufanikisha usajili huo. Romano ameeleza kuwa Diomande hajaonyesha nia ya kujiunga na Arsenal wala Manchester City, na pia hakuna klabu iliyoweka nguvu zote kwenye dili hilo kama ilivyofanya Real Madrid kupitia ofa yake kubwa.
Romano aliandika: “Manchester City na Arsenal zimefanya mawasiliano kuhusu Yan Diomande katika siku 10 zilizopita, lakini mchezaji hajafungua mlango kwa uwezekano wa kuhamia huko.”
