Mashabiki wa Manchester United wataweza kumwona mapema kuliko ilivyopangwa kile ambacho usajili wao mpya Ederson anaweza kufanya, baada ya kuitwa kwenye kikosi cha Brazil cha Kombe la Dunia.
Ederson atakuwa rasmi mchezaji wa Manchester United mwezi Julai baada ya kujiunga kwa dau la pauni milioni 39 kutoka klabu ya Atalanta ya Italia.
Alitarajiwa kuwa na majira ya joto ya bure kujiandaa na uhamisho wake kwenda England, lakini mipango hiyo imebadilika kwani sasa atajikita kwenye mashindano yatakayofanyika Canada, Mexico na Marekani.
Siku ya Jumapili, kiungo huyo mwenye umri wa miaka 26 aliitwa na kocha wa Brazil Carlo Ancelotti kama mbadala wa majeruhi katika kikosi cha Kombe la Dunia baada ya beki Wesley kuondolewa kutokana na majeraha.
Beki huyo wa pembeni alipata majeraha ya paja la kushoto katika kipindi cha kwanza cha ushindi wa mechi ya kirafiki ya 2-1 dhidi ya Misri siku ya Jumamosi mjini Cleveland.
“Tathmini ya MRI ilionyesha majeraha ya misuli kwenye adductor ya paja lake la kushoto,” lilisema Shirikisho la Soka la Brazil katika taarifa yake.
Shirikisho la Soka la Brazil (CBF) limesikitishwa na jeraha hilo. Wesley ni mchezaji anayependwa sana na kikosi na ataendelea kuhesabiwa kama sehemu ya timu hii inayoisaka taji lake la sita la Kombe la Dunia.
Brazil wataanza kampeni yao ya Kombe la Dunia tarehe 13 Juni watakapomenyana na Morocco (saa 11:00 jioni BST) katika Kundi C, kabla ya kucheza dhidi ya Haiti (20 Juni – saa 1:30 asubuhi BST) na Scotland (24 Juni – saa 11:00 jioni BST).
Baada ya kujiunga na Manchester United baada ya Kombe la Dunia, Ederson atasaini mkataba wa miaka minne na “Red Devils” huku kocha mkuu Michael Carrick akianza mchakato wa kuiboresha safu yao ya kiungo.
Mkataba huo, uliokamilishwa Jumanne mchana, utaifanya United kulipa ada ya awali ya pauni milioni 34 kwa Atalanta, huku kiasi kilichobaki kikitokana na vigezo vya nyongeza (add-ons).
