Gazeti la Gazzetta dello Sport limearifu kuwa Tottenham Hotspur na Bayern Munich wanaonyesha nia ya kweli ya kumsajili mshambuliaji wa Juventus, Dusan Vlahovic, ambaye kwa sasa anapitia kipindi kigumu.
Mchezaji huyo wa kimataifa kutoka Serbia bado ndiye mfungaji bora wa Juventus msimu huu akiwa na magoli manne katika mechi 11 kwenye mashindano yote, lakini hajafanikiwa kufunga tangu Septemba 16.
Jumapili, alianza katika mchezo uliomalizika kwa Juventus kupoteza 1–0 dhidi ya Lazio, matokeo ambayo yalikuwa kipigo cha tatu mfululizo kwa Bianconeri na yakasababisha kufutwa kazi kwa kocha Igor Tudor.
Kwa mara ya kwanza tangu mwaka 1991, Juventus hawajafunga katika mechi nne mfululizo, na hawajashinda katika mechi nane mfululizo tangu mwaka 2009. Ingawa Tudor alimrithi Thiago Motta mnamo Machi 2025, gazeti hilo limeonya kuwa si sahihi kumlaumu peke yake kwa kuporomoka kwa kiwango cha Juventus hivi karibuni.
Gazzetta pia imeeleza kuwa Juventus wanakosa wachezaji wa kiwango cha juu ndani ya kikosi chao, huku likifanya uchambuzi maalum wa hali ya Vlahovic.
Kwa mujibu wa ripoti, Tottenham na Bayern Munich wako makini kufuatilia maendeleo ya mshambuliaji huyo, huku wakipanga kumnasa dirisha lijalo la usajili.
Mhariri msaidizi wa Gazzetta dello Sport, Stefano Agresti, aliandika: “Tudor anabadilisha mambo, lakini matokeo yanabaki vilevile. Juventus hawajawahi kuwa na takwimu kama hizi tangu enzi za Maifredi mwaka 1991. Vlahovic amepoteza ile chembe ya uchawi iliyokuwa imemrudisha katika amani na ulimwengu wa weusi na weupe.”
“Mshambuliaji huyo wa Serbia hakifungi wala kusaidia kikosi, jambo ambalo limekuwa changamoto kwa kocha katika kuchagua mfumo na kitovu cha shambulio. Anaweza kuondoka Januari kwani Tottenham na Bayern Munich wanaonyesha nia ya kweli.”
