Aston Villa Wapanga Kumsajili Morgan Gibbs-White Wakati Mustakabali Wake Forest Ukiwa Mashakani

Aston Villa wanapima uwezekano wa kufanya uhamisho mkubwa majira ya kiangazi kwa ajili ya nyota wa Nottingham Forest, Morgan Gibbs-White, kwa mujibu wa TEAMtalk.

Gibbs-White alikuwa karibu kujiunga na Tottenham mwaka jana baada ya Spurs kuamilisha kipengele cha kuachiliwa (release clause) kilichokuwa kwenye mkataba wa kiungo huyo.

Ofa hiyo ilisababisha hasira kubwa kutoka kwa Forest, ambao walifikiria kuchukua hatua za kisheria dhidi ya klabu hiyo ya kaskazini mwa London.

Hatimaye, Gibbs-White alisaini mkataba mpya na The Tricky Trees, lakini tetesi kuhusu mustakabali wake zimeendelea kushika kasi. Forest wanapitia msimu mgumu na kwa sasa wapo pointi mbili tu juu ya eneo la kushuka daraja kufuatia michezo ya Jumanne.

Hata hivyo,klabu hiyo imemtimua Sean Dyche, ambaye ni kocha wa tatu wa Forest msimu huu, Villa wanaripotiwa kufuatilia kwa karibu hali ya mchezaji huyo mwenye umri wa miaka 26.

The Villans walijaribu kusajili kiungo mpya dirisha la Januari kufuatia majeraha ya Boubacar Kamara na Youri Tielemans.

Kikosi cha Unai Emery kilionekana kuwa karibu kumsajili Conor Gallagher kutoka Atletico Madrid, lakini kiungo huyo wa Uingereza aliishia kujiunga na Spurs.

Aston Villa kisha walimrejesha Douglas Luiz kwa mkopo hadi mwisho wa msimu baada ya Mbrazil huyo kushindwa kupata muda wa kutosha wa kucheza katika kipindi chake cha mkopo Forest.

Timu hiyo ya Midlands pia ina wasiwasi kuhusu mustakabali wa Morgan Rogers katika Uwanja wa Villa Park, huku Gibbs-White akitajwa kama mbadala anayetarajiwa kuchukua nafasi ya mchezaji huyo wa zamani wa Middlesbrough.

Rogers alisaini mkataba mpya na Villa mwaka jana, lakini anawaniwa na vilabu kadhaa vya Ligi Kuu England, vikiwemo Spurs, Chelsea na Liverpool.

Aston Villa watacheza dhidi ya Brighton nyumbani Jumatano usiku wakilenga kuboresha rekodi yao ya ushindi mmoja katika mechi tano zilizopita.