Nicolò Barella anakiri kuwa FK Bodø/Glimt walistahili kusonga mbele hadi hatua ya 16 bora ya UEFA Champions League, lakini anasisitiza kuwa lengo la Inter Milan “ni Scudetto na imekuwa hivyo tangu mwanzo wa msimu.
Nerazzurri walijua walihitaji kitu cha kipekee kufuta kipigo cha 3-1 walichopata kwenye mechi ya kwanza nchini Norway, na waliamini kabisa wana uwezo wa kufanya hivyo wakiwa uwanjani San Siro.
Hata hivyo, licha ya kumiliki mpira kwa muda mrefu na kutengeneza nafasi nyingi, walikosa makali mbele na kufanya makosa ya msingi safu ya ulinzi, hasa kosa la Manuel Akanji lililosababisha bao la kwanza la Jens-Petter Hauge.
Hakon Evjen aliongeza bao la pili, huku Alessandro Bastoni akifunga bao la kufutia machozi kwa mpira wa kona, na hivyo Inter kuondolewa kwa jumla ya mabao 5-2.
“Tulifungwa kwa kosa la mchezaji mmoja, jambo ambalo hutokea kwenye soka, lakini kilichokuwa kigumu zaidi ni kuvunja ukuta wa mabao na hatukufanikiwa. Bodø wanastahili pongezi, wametufunga nyumbani na ugenini, kwa hiyo ni wazi walistahili kusonga mbele,” Barella aliiambia Sky Sport Italia.
Inter imekuwa mwakilishi bora wa Italia barani Ulaya katika miaka ya hivi karibuni, ikifika fainali ya Champions League mara mbili katika misimu mitatu iliyopita chini ya kocha Simone Inzaghi.
Hawajawahi kutolewa mapema hivi tangu enzi za Antonio Conte aliposhindwa kuvuka hatua ya makundi msimu wa 2020-21. Tofauti na wakati huo waliposhuka hadi Europa League, safari hii kampeni yao ya Ulaya imefikia mwisho kabisa.
“Kuna huzuni kwa sababu hatujawahi kuficha hamu yetu ya kushindania kila mashindano. Tulijaribu, wao walifanya vizuri zaidi. Lakini hivi ndivyo ilivyo katika mfumo mpya wa Champions League,” alisema Barella.
Sasa Inter wanapaswa kuelekeza nguvu zao zote kwenye Serie A, ambapo wanaongoza msimamo kwa tofauti ya pointi 10, pamoja na nusu fainali ya Coppa Italia dhidi ya Como.
Mawazo yetu yalikuwa kufika mbali katika kila mashindano, jambo ambalo tumelifanya kwa miaka kadhaa sasa. Mara ya mwisho tulipotolewa na Atletico Madrid, tulishinda Scudetto. Safari hii tumetolewa na Bodo na tunaongoza kwa pointi 10. Kwa kawaida, lengo ni Scudetto, lakini hilo limekuwa lengo tangu mwanzo wa msimu. Alihitimisha Barella.
