Polisi wa Czech wamewaandikisha askari 250 zaidi kabla ya fainali ya Ligi ya Europa kati ya West Ham na Fiorentina mjini Prague.
Polisi wa eneo hilo wanafanya kazi kwa kushirikiana na polisi wa serikali na UEFA kuhakikisha mechi hiyo inapita kwa amani.
Hata hivyo, afisa mmoja aliliambia shirika la habari la PA tayari kumekuwa na matukio kadhaa yanayohusisha mashabiki wa West Ham, na kuongeza kuwa wako tayari kwa matatizo.
Takriban mashabiki 20,000 wa Hammers wanatarajiwa kusafiri hadi mji mkuu wa Czech, lakini wengi wao hawana tiketi kwani vilabu vyote viwili vina mgao wa chini ya 5,000 pekee kwa mechi hiyo.
Maelfu walikuwa tayari wamewasili Prague kufikia Jumanne alasiri, siku moja kabla ya fainali. Viwanja vya mashabiki vitawekwa katikati mwa jiji ili wafuasi hao wasio na tiketi waweze kutazama mechi kwenye skrini kubwa.
Huduma ya basi la abiria pia imepangwa kuwasafirisha mashabiki moja kwa moja kutoka uwanja wa ndege hadi kwenye bustani.
Ushindi wa nusu fainali wa West Ham dhidi ya AZ Alkmaar uligubikwa na kundi kubwa la mashabiki wa Uholanzi waliojaribu kuvamia sehemu iliyojaa marafiki na familia ya wachezaji na wafanyakazi wa West Ham.
Fainali ya kesho ni ya kwanza kwa West Ham barani Ulaya tangu 1976, na wanawania kushinda kombe la kwanza tangu Kombe la FA miaka 43 iliyopita.
