Inter watakutana na Al-Nassr na PSG wakati wa ziara yao ya kujiandaa na msimu mpya nchini Japan, lakini Simone Inzaghi ana matatizo mawili makubwa ya kutatua moja langoni na lingine katika ushambuliaji.
Nerazzurri iliondoka kwenda Asia siku ya jana, lakini timu ya Inzaghi bado haijakamilika. Hali ya makipa inamsumbua sana kocha Inzaghi ikizingatiwa kuwa klabu bado haijasajili mbadala wa André Onana na Samir Handanovic.
Alessandro Calligaris mwenye miaka 18, Filip Stankovic mwenye miaka 21, mtoto wa gwiji wa Inter Dejan na Raffaele Di Gennaro ndio makipa watatu walioitwa na bosi wa Nerazzurri kwa ziara ya kujiandaa na msimu mpya nchini Japan.
Di Gennaro mwenye miaka 29, ni zao la akademia ya Inter lakini aliondoka katika klabu hiyo mwaka wa 2019 na kujiunga na Catanzaro kwa uhamisho wa bure.
Alirejea Stadio Meazza kama mchezaji huru mapema msimu huu wa joto baada ya kukaa msimu uliopita na Gubbio wa Serie C. Di Gennaro ndiye mchezaji pekee aliyenunuliwa na Inter katika goli hadi sasa katika dirisha la usajili la majira ya kiangazi.
Sio siri kuwa Yann Sommer na Anatoliy Trubin ndio walengwa wakuu wa Inter kuchukua nafasi za Handanovic na Onana, lakini Beppe Marotta bado hajafikia makubaliano na Bayern Munich au Shakhtar Donetsk.
Mlinda mlango wa zamani wa Manchester United, David De Gea pia ametajwa kuwa mchezaji anayeweza kuimarisha klabu ya Inter.
