PSG na Bayern Munich walitoa nusu fainali ya kusisimua ya UEFA Champions League, huku mabingwa watetezi PSG wakipata ushindi wa 5-4 katika mchezo wa kwanza uliochezwa kwenye Parc des Princes.
Katika mechi iliyokuwa na mabao mengi zaidi kuwahi kushuhudiwa katika nusu fainali ya mashindano hayo, PSG walirejea kutoka nyuma baada ya penalti ya mapema ya Harry Kane bao lake la 54 msimu huu na kuongoza 5-2 kufikia dakika ya 58.
Khvicha Kvaratskhelia na Ousmane Dembele kila mmoja alifunga mabao mawili, huku Joao Neves akiongeza bao la kichwa lenye nguvu.
Michael Olise alisawazisha kwa shuti kali na kufanya matokeo kuwa 2-2, lakini mchezo ulianza kuwatoroka Bayern hadi mabao ya Dayot Upamecano na Luis Díaz yalipoonyesha mapambano yao.
Kocha wa Bayern Vincent Kompany alikuwa akitumikia adhabu ya kusimama pembeni baada ya kupata kadi tatu za njano kwenye mashindano.
Mashabiki wa PSG walidai penalti baada ya Aleksandar Pavlović kumchezea rafu Ousmane Dembélé, lakini ilikuwa upande mwingine ambapo mwamuzi wa Uswisi Sandro Schärer alielekeza penalti muda mfupi baadaye.
Shambulizi la haraka la Bayern Munich baada ya dakika 17 lilimalizika kwa Michael Olise kumpasia Luis Díaz kabla ya Willian Pacho kumwangusha Mcolombia huyo.
Harry Kane alifunga kwa urahisi penalti hiyo, akiendelea kufunga katika mechi ya sita mfululizo ya UEFA Champions League, ikiwa ni penalti yake ya 37 kati ya majaribio 39 akiwa Bayern.
Bayern walikaribia kuongeza bao la pili pale Kane alipompa pasi Olise, lakini Matvey Safonov aliokoa kwa mkono mmoja kabla ya Marquinhos kuondoa mpira kwenye mstari.
Ousmane Dembélé alipoteza nafasi ya wazi ya kufunga, lakini Paris Saint-Germain walisawazisha dakika ya 24. Désiré Doué alimwachia Khvicha Kvaratskhelia ambaye alikatiza ndani na kupiga shuti safi lililoingia kona ya mbali.
Olise aliwapita Nuno Mendes na Marquinhos kabla ya mpira kugonga mwamba, na baadaye Joao Neves akaonyesha ubora wake kwa kufunga kwa kichwa baada ya kona ya Dembele.
Doué alipiga shuti lililopita karibu kidogo, kabla ya Bayern kusawazisha dakika nne kabla ya mapumziko kupitia Olise aliyepiga shuti kali kutoka umbali wa mita 20.
Kulikuwa bado na drama zaidi kabla ya mapumziko, pale krosi ya Dembele ilipompiga Alphonso Davies mkononi baada ya kugonga mguu. Mwamuzi Sandro Schärer aliangalia VAR na kuamuru penalti, ambayo Dembélé aliifunga kwa ustadi akimshinda Manuel Neuer.
PSG walichukua udhibiti wa mechi kwa kufunga mabao mawili ndani ya dakika chache kabla ya saa moja ya mchezo. Kvaratskhelia alifunga baada ya pasi ya Achraf Hakimi, na Doué akamtengea Dembele aliyefunga kwa shuti la ujanja lililogonga mwamba na kuingia.
Bayern walionekana kuchanganyikiwa, lakini Dayot Upamecano alipunguza pengo kwa kichwa baada ya mpira wa adhabu wa Joshua Kimmich dakika ya 65.
Dakika tatu baadaye, Diaz alionyesha kipaji chake baada ya pasi ya Kane, akautuliza mpira vizuri na kumzidi nguvu Marquinhos kabla ya kufunga. Bao hilo lilisimamishwa awali kwa kuotea, lakini VAR iliruhusu lisimame.
Bayern walipata matumaini zaidi mwishoni mwa mchezo, huku Joshua Kimmich akikaribia kufunga lakini juhudi zake zikaondolewa mstari na Pacho, baada ya Senny Mayulu kugonga mwamba kwa upande wa PSG.
Matokeo hayo yanaipa Bayern imani kwamba wanaweza kubadili matokeo katika mchezo wa marudiano utakaochezwa Ujerumani.
