Calhanoglu Kuikosa Arsenal Baada ya Kuumia

Inter wamethibitisha kuwa Hakan Çalhanoğlu amepata jeraha la misuli kwenye ndama (calf) wa mguu wa kushoto, na kwa mujibu wa ripoti kutoka Italia, mchezaji huyo wa kimataifa wa Uturuki atakuwa nje ya uwanja kwa takribani siku 20.

Kwa mujibu wa vyanzo vya Italia, vikiwemo Sky Sport Italia, Inter watalazimika kukosa huduma za Çalhanoğlu kwa angalau siku 20 zijazo. Mchezaji huyo alilazimika kutolewa kipindi cha pili cha mchezo wa sare ya 2-2 dhidi ya Napoli uliochezwa Jumapili kwenye Uwanja wa Stadio Meazza.

Inter walithibitisha jeraha la kiungo wao kupitia taarifa iliyotolewa Jumanne asubuhi, wakisema: “Hakan Çalhanoğlu amefanyiwa kipimo cha MRI leo asubuhi katika Taasisi ya Tiba ya Humanitas iliyopo Rozzano,” ilisema klabu ya Nerazzurri.

“Vipimo vimeonesha ana jeraha la misuli kwenye ndama wa mguu wa kushoto, na hali yake itaendelea kufuatiliwa na kutathminiwa katika siku zijazo.”

Çalhanoğlu, mwenye umri wa miaka 31, amefunga mabao manane na kutoa pasi nne za mabao katika mechi 22 alizocheza katika mashindano yote msimu huu.

Inter, vinara wa msimamo wa Serie A, wanatarajiwa kuikaribisha Lecce kwenye Uwanja wa San Siro Jumatano katika mechi ya kiporo ya raundi ya 16 ya Serie A, ambayo Nerazzurri hawakuicheza Desemba kutokana na kushiriki Supercoppa Italiana.

Inatarajiwa kuwa Çalhanoğlu atakosa pia mechi za Serie A dhidi ya Udinese, Pisa na Cremonese, pamoja na mechi za Ligi ya Mabingwa Ulaya dhidi ya Arsenal na Borussia Dortmund. Hata hivyo, kuna matumaini kuwa anaweza kurejea uwanjani katika mchezo wa ligi dhidi ya Sassuolo tarehe 8 Februari.