Kocha wa Manchester City Pep Guardiola ana matumaini Erling Haaland atarejea kutoka kwenye jeraha wikendi na anahisi matumaini Kalvin Phillips na Kyle Walker watakuwa fiti kabla ya Kombe la Dunia.
Haaland, ambaye amefunga mabao 17 katika mechi 11 za Primia Ligi msimu huu, alikosa mechi ya ushindi wa wikendi dhidi ya Leicester City kutokana na tatizo la enka ya kifundo cha mguu.
Mshambuliaji huyo alipata jeraha wakati City ilipotoka sare ya 0-0 kwenye Ligi ya Mabingwa dhidi ya klabu yake ya zamani Borussia Dortmund wiki iliyopita, huku akishindwa kuendelea wakati wa mapumziko.
Guardiola alithibitisha Jumamosi kwamba Haaland pia atakosekana kwenye mchezo siku ya Jumatano dhidi ya Sevilla, huku wao wakiwa tayari wamefuzu. Lakini anaonekana kuwa na matumaini kuhusu matarajio ya Haaland kurejea kwa wakati wa kumenyana na Fulham kwenye Uwanja wa Etihad siku ya Jumamosi.
Guardiola amesema kuwa mshambuliaji huyo; “Anajisikia vizuri ukilinganisha na Jumamosi, Jumapili, Jumatatu, kila siku anajisikia vizuri, lakini bado si asilimia 100 hatutaki kuchukua hatari maana tunatumaini kuwa tunaye na ana jisikia vizuri.”
Mchezaji mwenzake aliyesajiliwa kabla ya msimu mpya Phillips amekosekana kwa muda mrefu baada ya kuumia bega katika mchezo wa kirafiki dhidi ya Barcelona mwezi Agosti. Kiungo huyo wa zamani wa Leeds United ambaye amecheza dakika moja pekee ya soka ya Ligi Kuu msimu huu aliishia kuhitaji upasuaji na amekuwa nje tangu katikati ya Septemba.
