Hilton: 'Huwa Ninasahau Kama Nina Miaka 42'

Mara baada ya kusaini mkataba wa mwaka mmoja wa nyongeza, mlinzi wa klabu ya soka ya Montpellier mwenye umri wa miaka 42, Vitorino Hilton amefunguka na kusema kuwa ana sababu zake za kudumu katika soka namna hiyo.

Mshindi huyo mara mbili wa Ligue 1 Conforama aliiambia RMC: “Unatakiwa kufanya mazoezi kila siku. Ninajiandaa katika njia maalum kiasi kwamba huwa ninasahau umri wangu wa sasa. Ninauweka pembeni kabisa. Wakati mwingine ninasahau kabisa kama nina umri wa miaka 42 na ninacheza na mtu kama Joris Chotard ambaye ana umri wa miaka 18. Ninadhani kwamba jambo hilo linanisaidia sana kujisikia fiti na kujitoa hasa uwanjani.

“Miaka minne iliyopita nilidhani ya kwamba mke wangu atanisihi niache kucheza soka.”

“Miaka minne ama mitano iliyopita mke wangu aliniambia niache kucheza soka kwa muda huo. Kwa sasa yupo hapa pembeni yangu akinipa sapoti kubwa sana na ananiambia kuwa nisichoke, niendelee. Inanipa moyo sana na nguvu zaidi. Upendo wangu kwenye soka bado upo moyoni mwangu. Ninaipenda soka tangu nikiwa mtoto mdogo kabisa. Na ninadhani kuwa nitaendelea kuipenda soka hivi hivi na nina ari kubwa ya kucheza mpira wa miguu.”
Kwa sasa Hilton ameongeza muda wa miezi 12 mbele wakati ambapo Souleymane Camara, mwenzake wa klabu moja waliyoipa mafanikio na kutwaa taji mwaka 2012 wakiwa na Montpellier, yupo anakula bata zake kwenye boti akiwa na umri wa miaka 37 tu!

“Ninapenda sana kucheza!”

Hilton anasema kuwa: Nilikuwa na kocha nikiongea naye ambapo tulizungumza sana na kisha nikaongea na Mkurugenzi wa Michezo, Bruno Carotti. Nilimpa mawazo yangu ya kupenda kuendelea kucheza soka. Wiki moja mbele Rais ainitumia ujumbe akinitaka nirudi klabuni. Tulizungumza kwa dakika 20 na kisha nikasaini mkataba wa nyongeza. Ni rahisi sana, ninapenda sana kucheza kabumbu!”