Kipa wa Zamani wa Arsenal, Alex Manninger, Amefariki Dunia Baada ya Gari Lake Kuripotiwa Kugongwa na Treni.

Kipa wa zamani wa Arsenal na timu ya taifa ya Austria, Alex Manninger, amefariki dunia baada ya gari lake kuripotiwa kugongwa na treni mjini Salzburg siku ya jana.

Manninger alikuwa na umri wa miaka 48 na aliwahi kuchezea klabu kadhaa barani Ulaya, ikiwemo Juventus na Red Bull Salzburg. Klabu nyingi zilitoa salamu za rambirambi kupitia mitandao ya kijamii.

“Tunaomboleza kifo cha kipa wetu wa zamani Alexander Manninger, ambaye amepoteza maisha kwa ajali ya barabarani. Mawazo yetu yako pamoja na familia na marafiki zake. Pumzika kwa amani, Alexander,” Salzburg waliandika kwenye X.

Polisi wa Salzburg hawakumtaja Manninger moja kwa moja, lakini shirika la utangazaji la taifa la Austria, ORF, liliripoti kuwa alijeruhiwa vibaya katika tukio lililotokea kwenye kivuko cha reli asubuhi ya jana.

Polisi walisema gari lilipigwa na treni na kuburutwa wakati likivuka reli. Dereva alikuwa peke yake ndani ya gari, huku dereva wa treni akiwa salama.

“Tarehe 16 Aprili majira ya saa 2:20 asubuhi, polisi waliitwa kwenye ajali ya barabarani iliyohusisha treni ya abiria na gari katika kivuko cha reli huko Nußdorf am Haunsberg,” polisi walisema.

“Walipofika eneo la tukio, wahudumu wa dharura walikuta dereva wa gari, mwanaume mwenye umri wa miaka 48 kutoka Salzburg, tayari ametolewa kwenye gari na alikuwa akipewa huduma ya dharura ya uokoaji (CPR). Polisi walisaidia jitihada za kumrejesha uhai, ikiwa ni pamoja na kutumia kifaa cha defibrillator. Licha ya juhudi za ziada za wahudumu wa afya na daktari wa dharura, juhudi hizo hazikufanikiwa. Mwanaume huyo alifariki kutokana na majeraha yake.”

Manninger alishinda mataji ya Premier League na FA Cup mwaka 1998 akiwa na Arsenal, na pia aliwahi kutwaa ubingwa wa Serie A akiwa na Juventus. Alichezea timu ya taifa ya Austria mara 33.

Mkurugenzi wa michezo wa Austrian Football Association, Peter Schottel, alisema: “Alexander Manninger alikuwa balozi mkubwa wa soka la Austria ndani na nje ya uwanja, aliyetoa mfano bora katika taaluma yake ya kimataifa na kuwahamasisha makipa wengi chipukizi. Utaalamu wake, utulivu na uaminifu vilimfanya kuwa sehemu muhimu ya timu zake na timu ya taifa. Mafanikio yake yanastahili heshima ya juu na yatakumbukwa daima.”