Benchi Lamchosha Sure Boy Yanga

Baada ya misimu mitatu yenye mafanikio ndani ya mabingwa wa Tanzania Bara, Yanga, kiungo mkabaji Salum Abubakar “Sure Boy” ameamua kuondoka katika klabu hiyo mwishoni mwa msimu huu.

Kiungo huyo mwenye uzoefu, aliyejiunga na Yanga Januari 1, 2022 akitokea Azam FC, amekuwa mhimili muhimu katika kipindi ambacho klabu hiyo imekuwa na mafanikio makubwa katika historia yake ya hivi karibuni.

Katika kipindi chake, Sure Boy alichangia Yanga kutwaa mataji manne mfululizo ya Ligi Kuu Tanzania Bara kuanzia mwaka 2022 hadi 2025.

Mbali na ubabe huo wa ligi, Yanga pia ilifanya vizuri kwenye mashindano ya ndani kwa kushinda Kombe la Shirikisho (FA) kwa misimu minne mfululizo kuanzia 2022 hadi 2025.

Mbali na ubabe huo wa ligi, Yanga pia ilifanya vizuri kwenye mashindano ya ndani kwa kushinda Kombe la Shirikisho (FA) kwa misimu minne mfululizo kuanzia 2022 hadi 2025.

Katika mashindano ya kimataifa, Sure Boy alicheza jumla ya mechi 17, zikiwemo mechi 11 za Kombe la Shirikisho Afrika na sita za Ligi ya Mabingwa Afrika, akichangia kuimarika kwa klabu hiyo katika michuano ya Afrika.

Hata hivyo, licha ya mafanikio hayo, nafasi yake kikosini imeonekana kupungua msimu huu. Takwimu zinaonyesha amecheza mechi chache zaidi ukilinganisha na misimu iliyopita, hali ambayo vyanzo vinasema imechangia uamuzi wake wa kutaka kuondoka.

Kiongozi mmoja mwandamizi wa kamati ya utendaji ya Yanga amethibitisha kuwa mchezaji huyo amewasilisha barua rasmi kuomba kuachwa. “Sure Boy ameandika barua kwa uongozi wa klabu akiomba kuondoka. Tumeipokea na tutakaa kujadili suala hilo,” alisema kiongozi huyo.

Aliongeza kuwa licha ya nia ya mchezaji huyo kuondoka, bado ana mkataba halali na klabu. Kwa mujibu wa rekodi za klabu, Sure Boy bado ana mwaka mmoja uliosalia katika mkataba wake ambao utaisha mwishoni mwa msimu ujao.

“Bado ni mchezaji wetu na ni sehemu muhimu ya timu. Tunamheshimu kwa mchango wake. Tutakutana naye na kutoa msimamo rasmi baada ya mazungumzo hayo,” aliongeza.

Iwapo ataondoka, hatua hiyo itahitimisha safari yenye mafanikio kwa pande zote mbili, wakati Yanga ikiendelea kujijenga upya na kuimarisha kikosi chake kwa ajili ya changamoto zijazo za ndani na kimataifa.

Kuondoka kwake, endapo kutathibitishwa, kunatarajiwa kuvutia vilabu kadhaa kutokana na uzoefu wake, uongozi wake na rekodi yake ya mafanikio ndani ya soka la Tanzania na Afrika.