Setien Kuishtaki Barcelona.

Kocha wa zamani wa Barcelona, Quique Setien na waliokuwa wasaidizi wake watatu wamefichua mpango wa kushtaki kikosi cha hicho kwa kutotii masharti ya kandarasi zao baada ya kufukuzwa mnamo Agosti 2020.

Kwa mujibu wa Setien na wenzake, Barcelona iliwapa notisi ya kukamilisha kandarasi zao mnamo Septemba 16 licha ya miamba hao wa soka duniani kuwatimua Agosti 17.

Aidha, Setien alisema kwamba hakuna yeyote katika benchi lake la ufundi pale Camp Nou alikuwa amelipwa fidia yoyote na barua ambayo yeye na wenzake walipewa na Barcelona mnamo Septemba 16 haikutaja mpango wowote wa kulipwa kwao.

“Barua kutoka kwa Barcelona inaashiria kwamba kikosi hicho hakina mpango wowote wa kutimiza masharti ya mikataba tuliyokuwa nayo tangu Januari 14, 2020,” akasema Setien.

Barcelona walimfuta kazi Setien siku tatu baada ya kikosi hicho kudhalilishwa kwa kichapo cha 8-2 kutoka kwa Bayern Munich ya Ujerumani kwenye robo-fainali za Klabu Bingwa Ulaya (UEFA) jijini Lisbon, Ureno.

Kutimuliwa kwake kulimpisha mkufunzi Ronald Koeman aliyewahi kuvalia jezi za Barcelona kati ya 1989 na 1995. Koeman aliajiriwa baada ya kushawishika na kuacha kukinoa kikosi cha timu ya taifa ya Uholanzi.

Setien ambaye pia amewahi kuinoa Real Betis, aliajiriwa na Barcelona mnamo Januari 2020 na alikuwa amesimamia jumla ya mechi 25 za Barcelona hadi kutimuliwa kwake.

Chini ya Setien, 61, Barcelona walikamilisha kampeni zao za msimu huu bila taji lolote kwa mara ya kwanza tangu 2008. Barcelona walikamilisha msimu huu kwenye La Liga katika nafasi ya pili kwa alama tano nyuma ya mabingwa Real Madrid.

Kichapo ambacho Barcelona walifungwa na Bayern kwenye UEFA kilikuwa cha nne katika kipindi cha miaka mitano iliyopita ambayo iliwabandua kwenye robo-fainali za kipute hicho cha bara Ulaya.

Quique alimrithi kocha Ernesto Valverde uwanjani Camp Nou mwanzoni mwa 2020.

Baada ya kumtimua Setien, Barcelona walisema: “Haya ndiyo maamuzi ya kwanza kati ya mengi ambayo tunalenga kuchukua katika juhudi za kukisuka upya kikosi chetu.”

Barcelona pia walimtangaza Ramon Planes kuwa mkurugenzi mpya wa kiufundi kambini mwao. Planes alikuwa msaidizi wa Eric Abidal aliyetimuliwa na Barcelona akiwa mkurugenzi wa spoti.

SHINDA NA MERIDIANBET!

Tengeneza pesa kidijitali kwa kubashiri mbio za farasi hapa Meridianbet! Chagua nani ashinde, unakusanya mkwanja.

Cheza Sasa.