Arsenal Kumbwaga Matteo Guendouzi Kwa Utovu wa Nidhamu

Nyota wa Arsenal Matteo Guendouzi hajafanya mazoezi na kikosi cha timu ya kwanza kwa zaidi ya wiki moja baada ya kupigwa marufuku na kocha wake Mikel Arteta. Mfaransa huyo amekuwa akifanya mazoezi binafsi pamoja na kocha wa viungo kwa kipindi cha wiki mbili zilizopita kufuatia vitendo vyake vya utovu wa nidhamu kwenye mchezo waliopoteza 2-1 dhidi ya Brighton.

Guendouzi alibahatika kutopata adhabu kwenye mchezo huo lakini kocha wake Mikel Arteta ameonyeshwa kukasirishwa na tabia ya kiungo huyo na ameamua kumtupa nje ya kikosi chacke. Alipoulizwa juu ya suala hilo, Arteta amesisitiza mara kwa mara kuwa tabia ya mchezaji huyo haijabadilika na bado Guendouzi ana shida ya utovu wa nidhamu.

Kwa mujibu wa Jarida la Athlete, Guendouzi aliitwa katika mahojiano na Arteta pamoja na mkurugenzi wa ufundi wa klabu Edu baada ya tukio la kumkaba Maupay wa Brighton na wawili hao hawakuridhika na majibu yake wakati alipoulizwa maswali juu ya tukio hilo.

Mfaransa huyo ameambiwa atakuwa akifanya mazoezi peke yake na mbali na wenzake hadi akijirekebisha tabia yake. Arsenal ilimsaini kiungo huyo mkabaji kwa pauni milioni 5 kutoka katika klabu ya Lorient na anatajwa kuwa mmoja wa wachezaji wenye nidhamu mbovu.

Kocha wa zamani wa Gunners, Unai Emery alikuwa akijua vyema matatizo ya utovu wa nidhamu wa Mfaransa huyo, ingawa alikuwa na imani angeweza kumbadilisha. Klabu sasa imepanga kukutana na wawakilishi wa Guendouzi katika siku zijazo kujadili mustakabali wake na inawezekana akaondoka klabuni hapo katika msimu huu wa joto.

Kwa sababu ya ukata wa kifedha wa Arsenal, klabu inaweza kupata pesa kwa mauzo ya kiungo huyo au kumtumia kama sehemu ya mabadilishano katika mkakati wake wa kumsaini kiungo wa Atletico Madrid Thomas Partey.