Beki wa Ufaransa Raphael Varane anasema washindi hao wa Kombe la Dunia ‘hawataingia katika mtego’ wa kujiamini kupita kiasi watakapokabiliana na Morocco katika mechi ya nusu fainali.
Ufaransa “haitaingia” katika mtego wa kujiamini kupita kiasi watakapochuana na nyota waliotoa mshangao kwenye kombe hilo Morocco, katika mchuano wao wa nusu fainali Jumatano, beki Mfaransa Raphael Varane amesisitiza.
Ingawa Morocco imeshangaza ulimwengu wa kandanda kwa kuwaondoa Hispania na Ureno katika awamu ya mtoano ya shindano hilo – na katika harakati za kuwa timu ya kwanza ya Kiafrika na Kiarabu kufuzu kwenye nusu fainali ya Kombe la Dunia, Les Bleus ya Ufaransa inasalia kupendekezwa sana kutwaa taji hilo mwaka huu.
Wafaransa hao tayari wamefikia lengo lililowekwa na shirikisho la soka la nchi yao la kufika katika timu nne za mwisho, lakini beki wa Ufaransa Varane alisema Jumatatu kwamba kikosi chake kilikuwa na njaa ya kufuzu kwa fainali ya Jumapili na hawataridhika watakapomenyana na Morocco.
“Tuna uzoefu wa kutosha katika timu ili tusianguke kwenye mtego huo,” Varane, mmoja wa manusura wa kampeni ya ushindi ya Ufaransa ya Kombe la Dunia 2018, alisema alipoulizwa kuhusu kujiamini kupita kiasi kabla ya mechi ya Morocco.
“Tunajua Morocco haiko hapa kwa bahati. Ni juu yetu wachezaji wazoefu kuhakikisha kila mmoja anajiandaa kwa vita vingine,” alisema.
“Si rahisi kufika nusu fainali ya Kombe la Dunia kwa hivyo tumefurahishwa sana, lakini lengo kuu ni kushinda,” aliongeza.
“Hilo ndilo lilikuwa lengo siku zote.”
Beki mwenzake wa Ufaransa Jules Kounde alisifu uchezaji wa timu ya Morocco kwenye michuano hiyo.
“Inashangaza kuwa wameruhusu bao moja pekee katika hatua hii ya mashindano, zaidi tukizingatia timu walizokutana nazo,” Kounde alisema.
“Zimesogeleana sana, zenye mistari inayokaribiana, na zinaacha muda mchache kwa mchezaji kwenye mpira kujipanga,” alisema.
