Liverpool Wajichelewesha Ubingwa!

Sare ya bila kufungana kati ya Liverpool na wenyeji Everton imewafanya Liverpool kuongeza alama moja hivyo kuwa na alama 23 mbele ya Manchester City wanaoshika nafasi ya pili katika msimamo wa ligi hiyo.

Kama vijana hao wa kocha Jurgen Klopp wangeshinda mechi hiyo, na kisha kushinda mechi ijayo dhidi ya Crystal Palace siku ya Jumatano, wangejihakikishia kubeba kombe la EPL ambalo hawajalibeba kwa miaka karibia 30 sasa!

Matokeo hayo yanamaanisha kuwa watatakiwa kusubiri washinde mechi yao ya Jumatano, huku wakimuombea mabaya Manchester City apoteze dhidi ya Burnley jumatatu ijayo.

Kocha wa Liverpool, Jurgen Klopp anaamini kuwa Everton walicheza vizuri zaidi yao na walistahili kushinda, hivyo matokeoa hayo ya sare ni bora zaidi kwake. Licha ya Liverpool kuwa na umiliki wa mpira wa zaidi ya asilimia 70, walifanikiwa kupiga mashuti matatu tu yaliyolenga lango!

Everton walionesha uhai mara zote waliposhika mpira kwa kupeleka kizaa zaa katika lango la Liverpool. Kama isingekuwa kwa mlinda mlango Alisson Becker, Liverpool wangepoteza mechi hiyo na hivyo kuwa mechi ya pili kupoteza tangu kuanza kwa msimu huu wa ligi.

“Sote tumeona nafasi alizookoa Alisson. Hakika alikuwa katika kiwango kizuri, ilikuwa mechi ngumu kwake. Mara nyingi mpira ulimkuta miguuni kuliko katika mikono yake” Alisema Klopp, “Hivi ndivyo golikipa bora anapaswa kuwa. Ametusaidia kupata alama moja muhimu”.