“Nipo Fiti Sana!” - Kane

Mshambuliaji nyota wa Tottenham Hotspurs, Harry Kane amesema kuwa kwa sasa anajisikia kuwa yuko vizuri kuliko kipindi chochote kile!

Kane jana amecheza mchezo wake wa 200 katika ligi kuu ya Uingereza huku akiisaidia timu yake kuibuka na ushindi wa 2-0 dhidi ya West Ham kwa goli lake la dakika ya 82 ya mchezo huo.

Mchezaji huyo ambaye ametoka kwenye majeraha ya muda mrefu, alionesha kiwango cha kuridhisha sana katika mechi hiyo kiasi cha kumvutia kila aliyepata nafasi ya kutazama mtanange huo.

“Nafikiri hiki ndicho mshambualiaji anapaswa kufanya, kufunga magoli na kuisaidia timu kuchukua alama tatu kwenye kila mchezo. Nafurahi kurudi katika orodha ya wafungaji leo”, alisema Kane katika mahojiano yake na kituo cha televisheni cha Sky Sports muda mchache baada ya mchezo huo kumalizika.

Kane ambaye alikua nje ya uwanja kwa zaidi ya kipindi cha nusu mwaka kwa sababu ya majeraha, alionesha kiwango kikubwa mno katik mechi hiyo tofauti na wengi walivyotarajia kwamba ingemchukua muda kiasi kuyazoea mazingira ya uwanjani tena.

“Niko poa zaidi sasa kuliko kipindi chochote kile, nilipata nafasi ya kupona na kupumzika kutoka kwenye majeraha”, akaongezea  “Kufunga ni jambo linaloleta furaha sana duniani, imekua muda mrefu tangu nifanye hivyo kwa mara ya mwisho.”

Goli hilo la Kane katika dakika ya 82 ya mchezo, ni goli la 137 kwa Kane katika ligi kuu katika miaka 6 aliyocheza kama mchezaji wa kikosi cha kwanza.

Nyota huyo wa Tottenham ana malengo ya kufikisha jumla ya magoli 200 katika ligi ya EPL na hilo linaonekana li mbioni kuwezekana kama asipobughuziwa na majeraha ya mara kwa mara kwani mpaka sasa ana miaka 26 tu!