Solskjaer Achekelea ‘Subs' Tano

Mara baada ya ligi ya EPL kukubali kufanya mabadiliko ya dharula katika upande wa ‘Subs’, moja kati ya watu walioipokea kwa furaha hatua hiyo ni kocha wa Man United, Ole Gunnar Solskjaer.

Sheria hiyo mpya ambayo imewekwa ili kumaliza msimu huu wa ligi, sio endelevu na imewekwa kama moja ya hatua zilizochukuliwa baada ya kuibuka kwa janga la Covid-19.

Ole Gunnar Solskjaer anaamini kuwa wachezaji watarudi viwanjani wakiwa hawana utimamu wa mwili wa kutosha kutokana na kuwa nje ya uwanja kwa zaidi ya miezi mitatu!

United watarejea uwanjani kwa mara ya kwanza kuwakabili Tottenham Hotspurs kabla hawajaumana na wabishi Sheffield United. United pia wana kibarua kizito katika mechi ya robo fainali ya mashindano ya FA dhidi ya Norwich.

Kitakua ni kipindi kigumu kwa Solskjaer na vijana wake wakipambana kufa na kupona ili kuifanya timu imalize katika nafasi za juu za msimamo! Marekebisho hayo ya sheria yanaonekana kuja wakati muafaka kabisa kwao.

“Ni msimu mfupi, tuna mechi tisa tu (za ligi kuu)! Lengo ni kupata alama nyingi kadri tuwezavyo!”

“Ninazingatia kila mechi inayokuja mbele yangu, lakini pia kujenga kikosi upya. Tuna kikosi chenye vijana wenye vipaji vya hali ya juu. Paul (Pogba) na Marcus (Rashford) wamerejea kikosini, Eric (Bailly) alikua nje kwa muda mrefu zaidi, Scott (McTominay) nae pia”, Solskijaer.

Marcus Rashford na Paul Pogba walipata muda wa kutibiwa majeraha yaliyokuwa yakiwakabili katika likizo hii ya Corona.

Solskjaer anaamini wachezaji wa namna hiyo, waliotoka kuuguza majeraha hawatoweza kucheza mechi nzima hivyo ameipokea kwa furaha sheria hiyo mpya inayowaruhusu makocha kufanya mabadiliko hata mara tano katika mechi, badala ya mara tatu iliyozoeleka.